خیبر پختونخوا(پاک ترک نیوز)ڈیرہ اسماعیل خان میں رات گئے دہشت گردوں نے تھانہ بند کورائی کو نشانہ بنانے کی کوشش کی، تاہم پولیس کی بروقت اور مؤثر جوابی کارروائی نے حملہ ناکام بنا دیا۔
پولیس ترجمان کے مطابق دہشت گردوں نے بھاری ہتھیاروں سے حملہ کیا اور بارود سے بھری پک اپ گاڑی تھانے کے مرکزی گیٹ سے ٹکرا دی، جس کے نتیجے میں زوردار دھماکا ہوا۔ دھماکے سے تھانے کی دیوار اور مسجد کو نقصان پہنچا۔
پولیس اہلکاروں نے فوری اور منظم جوابی کارروائی کرتے ہوئے دہشت گردوں کو پسپا کردیا۔ شدید دھماکے اور بھاری ہتھیاروں سے حملے کے باوجود پولیس جوان اپنی پوزیشنوں پر ڈٹے رہے اور دہشت گرد تھانے میں داخل نہ ہوسکے۔
یہ بھی پڑھیں: راولپنڈی ٹیسٹ: سری لنکا کی ٹیم 446رنز پر آؤٹ ،پاکستان پر 12رنز کی برتری
پولیس ترجمان کے مطابق حملے میں کوئی جانی نقصان نہیں ہوا اور تھانے میں تعینات تمام اہلکار محفوظ رہے۔
واقعے کی اطلاع ملتے ہی ڈی پی او ڈیرہ اسماعیل خان موقع پر پہنچ گئے اور سکیورٹی انتظامات کا جائزہ لیا۔ حملے کی آواز سن کر مقامی شہری بھی تھانے کے قریب پہنچ گئے اور پولیس کے ساتھ یکجہتی کا اظہار کیا۔
پولیس ترجمان کا کہنا ہے کہ اہلکاروں کی مستعدی، پیشگی حفاظتی انتظامات اور بروقت ردعمل کے باعث دہشت گردوں کا تھانے کو نشانہ بنانے کا منصوبہ ناکام بنا دیا گیا۔
