واشنگٹن (پاک ترک نیوز)دنیا بھر کا مسلسل سمندری سفر کرنے والے لگژری کروز شپ اوڈیسی کو مالی بحران کے باعث سنگاپور میں عدالتی حکم پر ضبط کرلیا گیا۔
غیر ملکی میڈیا کے مطابق امریکی کمپنی ولا وی ریزیڈنسز کے زیرِ انتظام جہاز اتوار کو کمبوڈیا سے سنگاپور پہنچا تھا، جہاں اسے عدالتی حکم کے تحت حراست میں لے لیا گیا۔ جہاز پر اب کوئی مسافر موجود نہیں، تاہم عملے کے 156 ارکان کی خیریت سے متعلق حکام نے اطمینان کا اظہار کیا ہے۔
رپورٹ کے مطابق اوڈیسی پر سوار تقریباً 200 مسافروں کو گزشتہ ماہ کمبوڈیا کی بندرگاہ سیہانوک ویل پر اچانک جہاز سے اترنے کا حکم دیا گیا تھا۔ کمپنی نے مالی مشکلات اور ایندھن کے اخراجات میں غیر معمولی اضافے کو آپریشن بند کرنے کی وجہ قرار دیا۔
کمپنی کے مطابق ایشیائی خطے میں فی کیبن ماہانہ ایندھن کے اخراجات 1800 ڈالر سے بڑھ کر 6 ہزار سے 8 ہزار ڈالر تک پہنچ گئے تھے۔
یہ بھی پڑھیں: وزیراعظم شہباز شریف تین روزہ دورے پر ترکیہ روانہ
دلچسپ بات یہ ہے کہ اس کروز شپ کو زندگی بھر سمندر میں رہنے اور دنیا کے مختلف ممالک کی سیر کرنے کے خواب کے طور پر پیش کیا گیا تھا۔ مسافروں کو جہاز میں کمرے خریدنے یا کرائے پر لینے کی سہولت دی گئی تھی۔ بعض مسافروں نے اس سفر کے لیے اپنا تمام اثاثہ تک فروخت کردیا تھا۔
تقریباً 200 میٹر طویل اس جہاز پر 203 مسافر اور 156 عملے کے ارکان سوار تھے۔ اب جہاز سنگاپور کی بندرگاہ کے سمندری حدود میں لنگر انداز ہے اور اس کی آئندہ روانگی سے متعلق صورتحال واضح نہیں۔
