واشنگٹن(پاک ترک نیوز) دنیا کے جدید ترین اسٹیلتھ جنگی طیاروں میں شمار ہونے والے امریکی ایف 35 پروگرام میں ایک بڑا انتظامی بحران سامنے آگیا، ایک ملین سے زائد اضافی پرزے غائب ہیں، جبکہ 85 ملین ڈالر مالیت کا سامان برسوں گزرنے کے باوجود تلاش نہیں کیا جا سکا۔
امریکی سرکاری آڈٹ ادارے گورنمنٹ اکاؤنٹیبلٹی آفس، جی اے او کی 9 نومبر کو جاری ہونے والی رپورٹ کے مطابق پینٹاگون دنیا بھر میں موجود ایف 35 کے تقریباً 2 کروڑ 60 لاکھ اسپیئر پارٹس کا مکمل ریکارڈ برقرار رکھنے میں ناکام ہے، جن کی مجموعی مالیت تقریباً 31 ارب ڈالر بتائی گئی ہے۔
رپورٹ میں انکشاف کیا گیا ہے کہ دستیاب ریکارڈ بھی نامکمل، غیر درست اور پرانا ہے، جس کے باعث حکام کو یہ معلوم نہیں کہ کون سا پرزہ کہاں موجود ہے، کہاں منتقل ہوا اور کہاں استعمال ہو چکا ہے۔
یہ مسئلہ نیا نہیں۔۔۔ مئی 2023 میں بھی امریکی آڈٹ ادارے نے ایک رپورٹ میں بتایا تھا کہ گزشتہ پانچ برس کے دوران 10 لاکھ سے زائد ایف 35 اسپیئر پارٹس غائب ہوئے، جن کی مالیت 85 ملین ڈالر تھی۔۔۔ حیران کن طور پر مارچ 2026 تک بھی یہ پرزے تلاش نہیں کیے جا سکے۔
ایف 35 پروگرام کے تحت امریکی فضائیہ، بحریہ، میرین کور اور متعدد اتحادی ممالک مشترکہ طور پر اسپیئر پارٹس استعمال کرتے ہیں۔۔۔ ان میں انجن، ٹائر، تکنیکی آلات، بولٹس اور دیگر اہم پرزے شامل ہیں۔
رپورٹ کے مطابق ایف 35 بنانے والی کمپنی لاک ہیڈ مارٹن اور انجن تیار کرنے والی کمپنی پراٹ اینڈ وٹنی کے سپلائی چین سسٹمز امریکی محکمہ دفاع کے مرکزی لاجسٹک نظام سے براہ راست منسلک نہیں۔۔۔ بعض معلومات ہر تین ماہ بعد اپ ڈیٹ ہوتی ہیں، جس کے باعث پرزوں کی نقل و حرکت کا بروقت پتا نہیں چل پاتا۔
یہ بھی پڑھیں: اسکاٹ لینڈ کا بھی افغانستان کے ساتھ دوطرفہ کرکٹ نہ کھیلنے کا فیصلہ
جی اے او کے مطابق امریکی محکمہ دفاع نے 2020 سے 2025 تک پرزوں کی فزیکل گنتی پر کم از کم 17 ملین ڈالر خرچ کیے، لیکن اس کے باوجود انوینٹری کا نظام قابلِ اعتماد ثابت نہیں ہو سکا۔
رپورٹ میں پینٹاگون کو پرزوں کے نقصان کی نگرانی، متعلقہ افسران کی تربیت اور ریکارڈنگ کا جدید نظام متعارف کرانے کی سفارش کی گئی ہے۔
ایف 35 جوائنٹ پروگرام آفس نے آڈٹ رپورٹ کی سفارشات سے اتفاق کرتے ہوئے کہا ہے کہ سرکاری اور نجی کمپنیوں کے نظام کو براہ راست منسلک کرنے اور پرزوں کی حقیقی وقت میں نگرانی کے لیے اقدامات کیے جا رہے ہیں۔
واضح رہے کہ ستمبر 2026 میں بھی ایف 35 کے حساس پرزوں کی ایک کھیپ آسٹریلیا سے امریکا مرمت کے لیے بھیجی گئی، لیکن مبینہ طور پر ہانگ کانگ پہنچنے کے بعد لاپتا ہوگئی تھی۔۔۔ اس کھیپ میں اسٹیلتھ ٹیکنالوجی سے متعلق حساس پرزے بھی شامل تھے۔
