لندن (پاک ترک نیوز)برطانیہ نے بین الاقوامی طلبہ کے اسٹڈی ویزا کے لیے مالی وسائل کی شرائط میں اضافے کا اعلان کیا ہے، نئی شرائط 30 نومبر 2026 سے نافذ ہونے کی اطلاع ہے۔
رپورٹ کے مطابق لندن میں تعلیم حاصل کرنے کے خواہش مند طلبہ کو رہائشی اخراجات کے لیے کم از کم 14 ہزار 130 پاؤنڈ کی مالی دستیابی ثابت کرنا ہوگی، جبکہ موجودہ حد 13 ہزار 761 پاؤنڈ ہے۔
لندن میں طلبہ کے لیے ماہانہ رہائشی اخراجات کی مقررہ رقم ایک ہزار 529 پاؤنڈ سے بڑھا کر ایک ہزار 570 پاؤنڈ کر دی جائے گی۔
لندن سے باہر تعلیم حاصل کرنے والے طلبہ کے لیے بھی مالی شرائط بڑھائی گئی ہیں۔ ان کے ماہانہ رہائشی اخراجات کی مقررہ رقم ایک ہزار 171 پاؤنڈ سے بڑھا کر ایک ہزار 203 پاؤنڈ کرنے کی اطلاع ہے۔ نو ماہ کے لیے مطلوبہ رقم 10 ہزار 539 پاؤنڈ سے بڑھ کر 10 ہزار 827 پاؤنڈ ہو جائے گی۔
رپورٹ کے مطابق یہ رقم صرف رہائشی اخراجات کے لیے ہے اور اس میں یونیورسٹی کی ٹیوشن فیس شامل نہیں۔ طلبہ کو ویزا فیس اور امیگریشن ہیلتھ سرچارج کے اخراجات بھی الگ سے برداشت کرنا ہوں گے۔
یہ بھی پڑھیں: لاہور میں ڈرائیونگ کے لیے میڈیکل فٹنس ٹیسٹ لازمی کرنے کی تجویز
نئی شرائط کے تحت برطانیہ میں تعلیم حاصل کرنے کے خواہش مند بین الاقوامی طلبہ کو ویزا درخواست جمع کرانے سے پہلے اپنے مالی وسائل اور اخراجات کا ازسرِنو جائزہ لینا ہوگا۔
