لاہور(پاک ترک نیوز)لاہور ہائیکورٹ نے بچوں کے نان و نفقہ سے متعلق اہم فیصلے میں قرار دیا ہے کہ والدین کی علیحدگی یا شادی ختم ہونے سے بچوں کی کفالت کی ذمہ داری ختم نہیں ہوتی۔ عدالت نے بیرونِ ملک مقیم والد کو فی بچہ ماہانہ نان و نفقہ 20 ہزار روپے سے بڑھا کر 30 ہزار روپے ادا کرنے کا حکم دے دیا۔
لاہور ہائیکورٹ کے جسٹس محسن اختر کیانی نے صائقہ کی درخواست پر فیصلہ جاری کیا۔
عدالت نے قرار دیا کہ والد کی آمدن محدود ہونے کا دعویٰ بچوں کے نان و نفقہ کی ذمہ داری سے بری نہیں کرتا۔ بچوں کے اخراجات کا تعین کرتے وقت والد کی مالی حیثیت اور بچوں کی ضروریات کو مدنظر رکھنا ضروری ہے۔
فیصلے کے مطابق ریکارڈ میں بچوں کے والد کی جانب سے بیرونِ ملک مناسب تنخواہ نہ ہونے کا مؤقف اختیار کیا گیا تھا، تاہم عدالت نے ہدایت کی کہ والد کی اصل آمدن اور کام کی نوعیت کا تعین شواہد کی روشنی میں کیا جائے۔
یہ بھی پڑھیں: سب میرین کیبل کی خرابی ،پاکستان میں 2 نومبر تک انٹرنیٹ سست رہنے کا امکان
عدالت نے برطانوی حکومت کی سرکاری ویب سائٹ پر مقررہ کم از کم اجرت کا بھی حوالہ دیا۔
فیصلے میں بچوں کے نان و نفقہ میں سالانہ 10 فیصد اضافے کا اطلاق نومبر 2019 سے شمار کرنے کا حکم بھی دیا گیا۔
عدالتی ریکارڈ کے مطابق درخواست گزار صائقہ کی شادی زاہد اقبال سے 2010 میں ہوئی تھی۔
