کاکول (پاک ترک نیوز)پاکستان ملٹری اکیڈمی کاکول میں پاسنگ آؤٹ پریڈ کی تقریب منعقد ہوئی، جس میں کمانڈر نیشنل اسٹریٹجک کمانڈ جنرل سید عامر رضا مہمانِ خصوصی تھے۔ تقریب میں 73ویں انٹیگریٹڈ کورس، 28ویں لیڈی کیڈٹ کورس، 154ویں پی ایم اے لانگ کورس اور 39ویں ٹیکنیکل گریجویٹ کورس کے کیڈٹس نے تربیت مکمل کرکے عملی زندگی میں قدم رکھا۔
تقریب سے خطاب کرتے ہوئے جنرل سید عامر رضا نے کہا کہ پاک فوج ملک کے چپے چپے کی حفاظت کے لیے ہمہ وقت تیار ہے، جبکہ افواجِ پاکستان نے ہر شعبے میں اپنی صلاحیتوں کا لوہا منوایا ہے۔ انہوں نے کیڈٹس پر زور دیا کہ وہ ملک کی سلامتی اور دفاع میں بھرپور کردار ادا کریں۔
پہ بھی پڑھیں: چالیس سال بعد بنگلہ دیش سے بچپن میں بچھڑنے والی خاتون کا خاندان مل گیا
جنرل سید عامر رضا نے کہا کہ خطے کی حالیہ کشیدہ صورتِ حال میں پاکستان نے عالمی سطح پر مثبت کردار ادا کیا، جبکہ کشیدگی میں کمی کے لیے پاکستان کی ثالثی کی کوششوں کو دنیا بھر نے دیکھا۔
انہوں نے فلسطین میں انسانی حقوق کی پامالی بند کرنے کی ضرورت پر زور دیتے ہوئے کہا کہ مسئلہ کشمیر اقوامِ متحدہ کی سلامتی کونسل کی قراردادوں کے مطابق حل طلب معاملہ ہے۔
تقریب کے دوران کیڈٹس نے شاندار مارچ پاسٹ کیا، جبکہ تربیت مکمل کرنے والے کیڈٹس کی پیشہ ورانہ صلاحیتوں اور نظم و ضبط کا مظاہرہ بھی کیا گیا۔
