سوات ( پاک ترک نیوز) سوات میں محکمہ انسداد دہشت گردی اور ضلعی پولیس کی علی الصبح کارروائی، فائرنگ کے تبادلے میں تین مطلوب دہشت گرد ہلاک، دو فرار ہوگئے۔ ہلاک دہشت گردوں کا تعلق ٹی ٹی پی کمانڈر مظفر عرف خالد گروپ سے بتایا گیا ہے، جن کے قبضے سے کلاشنکوفیں، گولیاں، تھانہ شکردرہ کا نقشہ اور ایک ڈائری برآمد ہوئی ہے۔محکمہ انسداد دہشت گردی کے مطابق کارروائی تھانہ کانجو کی حدود میں علاقے سخاڈوب میں کی گئی۔ خفیہ اطلاع پر پولیس اور سی ٹی ڈی کی ٹیموں نے دہشت گردوں کی موجودگی کی اطلاع پر آپریشن شروع کیا تو ملزمان نے اہلکاروں کو دیکھتے ہی فائرنگ کردی۔فائرنگ کے تبادلے کے بعد قریبی مکان کی تلاشی لی گئی، جہاں سے تین دہشت گردوں کی لاشیں برآمد ہوئیں، جبکہ فرار ہونے والے دو ملزمان کی تلاش جاری ہے۔
ہلاک دہشت گردوں کی شناخت عبداللہ، منصور علی اور غفران اللہ کے ناموں سے ہوئی ہے۔ تینوں کا تعلق ضلع سوات سے تھا۔حکام کے مطابق ہلاک دہشت گرد رواں سال فائرنگ کے متعدد واقعات میں ملوث رہے، جن میں افضل خان گجر پر حملہ، نعمت علی خان کے گھر اور ڈیرے پر فائرنگ اور سلیم اللہ عرف ساجد نیلا گرام کی ٹارگٹ کلنگ شامل ہیں۔کارروائی کے دوران تین کلاشنکوفیں، چھ میگزین، متعدد کارتوس، گیس سلنڈر، کھانے پینے کے برتن، شناختی کارڈز، تھانہ شکردرہ کا نقشہ اور ایک ڈائری بھی برآمد کی گئی۔
یہ بھی پڑھیں: سیاسی جماعت کو ختم کرنے کی کوشش کی جا رہی ہے، بیرسٹر گوہر
انسپکٹر جنرل پولیس خیبر پختونخوا ذوالفقار حمید اور محکمہ انسداد دہشت گردی کے اعلیٰ حکام نے کارروائی میں حصہ لینے والے اہلکاروں کی کارکردگی کو سراہتے ہوئے کہا ہے کہ صوبے سے دہشت گردی کے خاتمے تک کارروائیاں جاری رہیں گی۔
