کویت سٹی(پاک ترک نیوز)کویت نے فضائی خطرات اور ڈرون حملوں سے نمٹنے کے لیے برطانیہ میں تیار کردہ جدید فضائی دفاعی نظام خریدنے کا معاہدہ کر لیا ہے، جس کی مالیت 37 کروڑ پاؤنڈ ہے۔ معاہدے سے برطانیہ میں 100 نئی ملازمتیں بھی پیدا ہوں گی۔
برطانوی وزارتِ دفاع کے مطابق یہ معاہدہ دفاعی ٹیکنالوجی کی کمپنی مارس سسٹمز لمیٹڈ کے ساتھ کیا گیا ہے۔ منصوبے کے تحت جدید نظام کی تیاری برطانیہ کے شہر برسٹل میں کی جائے گی، جبکہ اس کی تنصیب اور مختلف حصوں کو یکجا کرنے کا کام بھی کمپنی کی ذمہ داری ہوگا۔
نئے فضائی دفاعی نظام میں جدید ریڈار، دشمن کے مواصلاتی نظام میں خلل ڈالنے والے آلات اور فضا میں موجود خطرات کو روکنے والے نظام شامل ہوں گے۔ مصنوعی ذہانت سے لیس نِی ڈار کمانڈ اینڈ کنٹرول نظام ان تمام حصوں کو ایک دوسرے سے منسلک کرے گا، تاکہ فضائی خطرات کی بروقت نشاندہی اور ان کے خلاف فوری کارروائی ممکن ہو سکے۔
یہ بھی پڑھیں: وزیراعظم سے مکہ دفاعی اتحاد کے سیکرٹری جنرل کی ملاقات، سعودی عرب کے دفاع کے لیے غیرمتزلزل عزم کا اعادہ
یہ معاہدہ برطانیہ کے ٹاسک فورس سیبر منصوبے کا حصہ ہے، جس کا مقصد خلیجی ممالک کو دفاعی سازوسامان اور جدید ہتھیاروں کی فراہمی میں مدد دینا ہے۔ یہ پیش رفت خطے میں ایران کے میزائل اور ڈرون حملوں کے بعد سامنے آئی ہے۔
برطانوی وزیر برائے دفاعی تیاری اور صنعت لیوک پولارڈ نے کہا کہ یہ معاہدہ علاقائی اتحادیوں کے دفاع میں برطانیہ کے تعاون کا ثبوت ہے۔ ان کے مطابق اس سے کویت کے دفاع کو مضبوط بنانے کے ساتھ برطانیہ میں ہنرمند افراد کے لیے روزگار کے مواقع بھی پیدا ہوں گے۔
