اسلام آباد(پاک ترک نیوز)وزیراعظم شہباز شریف سے مکہ دفاعی اتحاد کے پہلے سیکرٹری جنرل لیفٹیننٹ جنرل ریٹائرڈ نعمان محمود نے ملاقات کی۔ وزیراعظم نے عہدہ سنبھالنے پر جنرل ریٹائرڈ نعمان محمود کے لیے نیک خواہشات کا اظہار کیا۔
ملاقات کے دوران وزیراعظم شہباز شریف نے کہا کہ مکہ امن معاہدہ خطے میں امن، اتحاد اور استحکام کے لیے ایک تاریخی سنگِ میل ہے۔ انہوں نے کہا کہ معاہدے کے تحت پاکستان سعودی عرب کی خودمختاری، دفاع اور علاقائی سلامتی کے تحفظ کے لیے شانہ بشانہ کھڑا ہے۔
یہ بھی پڑھیں: خیبرپختونخوا میں گورنر راج کی منظوری ، قومی اسمبلی اور سینیٹ کے اجلاس آج ہوں گے
وزیراعظم نے سعودی عرب کے اپنے دفاع کے جائز حق کی مکمل حمایت کا اعادہ کرتے ہوئے کہا کہ پاکستان سعودی عرب کی خودمختاری، علاقائی سالمیت اور سلامتی کے تحفظ کے لیے اپنے غیرمتزلزل عزم پر قائم ہے۔
ملاقات میں مکہ دفاعی اتحاد کے سیکرٹری جنرل لیفٹیننٹ جنرل ریٹائرڈ نعمان محمود نے وزیراعظم کو معاہدے کے تحت دفاعی اور تزویراتی تعاون کو فروغ دینے کے لیے طے شدہ حکمت عملی سے آگاہ کیا۔
ملاقات میں خطے میں امن و استحکام کے لیے دفاعی تعاون اور پاکستان و سعودی عرب کے درمیان مشترکہ اقدامات کی اہمیت پر بھی تبادلہ خیال کیا گیا۔
