راولپنڈی(پاک ترک نیوز) حنا جاوید قتل کیس کی تحقیقات میں اہم پیش رفت سامنے آئی ہے، پنجاب حکومت کی جانب سے تشکیل دی گئی اعلیٰ سطحی تحقیقاتی کمیٹی راولپنڈی پہنچ گئی ہے، جہاں کمیٹی آج مقتولہ کے اہل خانہ سے ملاقات کرے گی۔ذرائع کے مطابق کمیٹی نے مقتولہ کے اہل خانہ کو ملاقات سے متعلق آگاہ کر دیا ہے۔ کمیٹی میں ایڈیشنل آئی جی سی سی ڈی سہیل ظفر چٹھہ اور ڈی آئی جی لاہور شعیب خرم شامل ہیں۔اعلیٰ سطحی کمیٹی نے حنا جاوید قتل کیس کی ازسرِنو تحقیقات شروع کر دی ہیں۔ اس سلسلے میں سہیل ظفر چٹھہ نے سی پی او حسن مشتاق سکھیرا کے ہمراہ جائے وقوعہ کا دورہ بھی کیا۔ اس موقع پر ایس ایس پی آپریشنز طارق محبوب اور ایس ایس پی انویسٹی گیشن سیف اللہ بھی موجود تھے۔
یہ بھی پڑھیں: دنیا شدید موسمیاتی خطرے کی لپیٹ میں، طاقتور ال نینو فروری 2027 تک جاری رہنے کا امکان
تحقیقاتی ٹیم نے لال کرتی میں واقع اس اپارٹمنٹ کا معائنہ کیا جہاں حنا جاوید کو مبینہ طور پر تشدد کے بعد قتل کیا گیا تھا۔ جائے وقوعہ پر موجود تفتیشی ٹیم نے اعلیٰ سطحی کمیٹی کو اب تک کی تحقیقات کے حوالے سے بریفنگ دی، جبکہ خصوصی تحقیقاتی ٹیم نے تفتیشی حکام سے مختلف اہم سوالات بھی کیے۔ذرائع کے مطابق مقتولہ کے اہل خانہ نے راولپنڈی پولیس کی تحقیقات پر تحفظات کا اظہار کیا تھا اور الزام عائد کیا تھا کہ تفتیش کا رخ موڑنے کی کوشش کی گئی۔ ان تحفظات کے بعد وزیراعلیٰ پنجاب مریم نواز نے کیس کی تحقیقات کے لیے اعلیٰ سطحی کمیٹی تشکیل دی تھی۔حنا جاوید قتل کیس کا مقدمہ تھانہ سول لائن میں درج ہے۔ اعلیٰ سطحی کمیٹی کی ازسرِنو تحقیقات سے کیس کے مختلف پہلوؤں کا جائزہ لیا جائے گا، جبکہ مقتولہ کے اہل خانہ کے تحفظات بھی سنے جائیں گے۔
