کراچی ( پاک ترک نیوز) سندھ حکومت نے فیک نیوز اور گمراہ کن اطلاعات کی روک تھام کے لیے نیا مانیٹرنگ نظام وضع کرنے کا فیصلہ کرلیا۔سندھ کے سینئر وزیر شرجیل انعام میمن کی زیر صدارت محکمہ اطلاعات کا اہم اجلاس ہوا، جس میں سیکریٹری اطلاعات کاشف گلزار شیخ، ڈائریکٹر جنرل اطلاعات معز پیرزادہ اور تمام شعبوں کے ڈائریکٹرز نے شرکت کی۔اجلاس میں سیکریٹری اطلاعات اور محکمہ اطلاعات کے تمام شعبوں کے ڈائریکٹرز کو فیک نیوز کی مانیٹرنگ اور مؤثر میڈیا حکمت عملی بنانے کی ہدایت کی گئی۔شرجیل انعام میمن نے کہا کہ جھوٹی اور گمراہ کن اطلاعات کے ذریعے کسی بھی شخص یا ادارے کو نقصان پہنچانے کی کوشش برداشت نہیں کی جائے گی۔
انہوں نے فیک نیوز اور گمراہ کن اطلاعات کی روک تھام کے لیے قومی سائبر جرائم تحقیقاتی ادارے سے معاونت لینے کی ہدایت کی۔سینئر وزیر نے کہا کہ مرکزی اور سماجی ذرائع ابلاغ پر جدید ٹیکنالوجی کی مدد سے فیک نیوز کی روزانہ کی بنیاد پر نگرانی کی جائے گی، جبکہ فیک نیوز کی نشاندہی، تصدیق اور بروقت تدارک کے لیے محکمہ اطلاعات میں مؤثر نظام وضع کیا جائے گا۔شرجیل انعام میمن نے فیک نیوز بنانے اور پھیلانے والوں کے خلاف قانونی کارروائی کے لیے قومی سائبر جرائم تحقیقاتی ادارے سے معاونت لینے کی ہدایت بھی کی۔انہوں نے کہا کہ فیک نیوز کے تدارک کے لیے محکمہ اطلاعات اور قومی سائبر جرائم تحقیقاتی ادارے کے درمیان تعاون مزید بڑھایا جائے گا۔
یہ بھی پڑھیں: آزاد کشمیر میں 20 ارب روپے کے پیکیج ، 100 روزہ منصوبے پر عمل ہو گا، امیر مقام
سینئر وزیر کے مطابق سندھ حکومت کا بیانیہ امن، رواداری، بین الصوبائی ہم آہنگی اور قومی اتحاد پر مبنی ہے۔ محکمہ اطلاعات جدید ذرائع ابلاغ سے استفادہ کرتے ہوئے سندھ حکومت کے مثبت اور تعمیری اقدامات کو مزید مؤثر انداز میں اجاگر کرے۔انہوں نے ہدایت کی کہ تمام طبقات کے نمائندوں کو سندھ حکومت کے بیانیے کا حصہ بنایا جائے اور فیک نیوز کی مانیٹرنگ کے ساتھ مثبت حکومتی بیانیے کی مؤثر ترویج پر بھی توجہ دی جائے
