اسلام آباد (پاک ترک نیوز )پاور ڈویژن نے بجلی کے صارفین کو غیر ضروری مشکلات اور اضافی مالی بوجھ سے بچانے کے لیے ڈیٹیکشن بلنگ کے نظام میں بنیادی اصلاحات متعارف کرانے کا فیصلہ کر لیا۔
پاور ڈویژن کے مطابق یہ اقدام بجلی کے شعبے میں جاری وسیع تر اصلاحاتی عمل کا حصہ ہے، جس کی قیادت وفاقی وزیر برائے پاور ڈویژن سردار اویس احمد خان لغاری کر رہے ہیں۔ اصلاحات کا مقصد صارفین کو زیادہ سے زیادہ ریلیف فراہم کرنا اور ان کے حقوق کا مؤثر تحفظ یقینی بنانا ہے۔
ماضی میں بجلی کے میٹر میں خرابی، تکنیکی مسائل یا بجلی کے استعمال کی درست ریڈنگ نہ ہونے کی صورت میں متعلقہ قوانین کے تحت اندازے سے ڈیٹیکشن بل جاری کیے جاتے تھے۔
تاہم بعض صورتوں میں اندازے کے مطابق مقرر کیا گیا بجلی کا استعمال اصل کھپت سے مطابقت نہیں رکھتا تھا، جس کے باعث صارفین کو اضافی اور بھاری بلوں کا سامنا کرنا پڑتا تھا۔
ایسے معاملات میں شکایات کے ازالے کا عمل بھی طویل ہوجاتا تھا، جبکہ موجودہ نظام میں انسانی مداخلت کے باعث شفافیت اور بے ضابطگیوں سے متعلق خدشات بھی سامنے آتے رہے۔
پاور ڈویژن نے ان مسائل کا نوٹس لیتے ہوئے ڈیٹیکشن بلنگ کے نظام کو ڈیجیٹل اور خودکار بنانے کا فیصلہ کیا ہے، تاکہ انسانی مداخلت اور غیر ضروری صوابدیدی اختیارات کو کم کیا جاسکے۔
اس سلسلے میں تمام بجلی کی تقسیم کار کمپنیوں کو ہدایات جاری کردی گئی ہیں کہ نیپرا کے کنزیومر سروس مینوئل میں ضروری ترامیم کی جائیں اور دیگر متعلقہ اقدامات بھی مکمل کیے جائیں۔
نئے نظام کے تحت ڈیٹیکشن بلنگ اور اس سے متعلق ریکوری کے عمل کی ہر ماہ نگرانی کی جائے گی۔
اس کے ذریعے زائد بلنگ اور بجلی کے استعمال میں غیر معمولی رجحانات کی بروقت نشاندہی ہوسکے گی، جس کے بعد فوری طور پر اصلاحی کارروائی کی جاسکے گی۔
وفاقی وزیر اویس لغاری کا کہنا ہے کہ پاور سیکٹر میں جاری اصلاحات کا بنیادی مقصد صارفین کو زیادہ سے زیادہ سہولت فراہم کرنا ہے۔
انہوں نے کہا کہ ڈیٹیکشن بلنگ کے نظام میں اصلاحات سے صارفین کے حقوق کا تحفظ، بلنگ کے عمل میں شفافیت اور بجلی کے نظام پر عوام کا اعتماد مزید مضبوط ہوگا۔
