لاہور(پاک ترک نیوز ) لاہور ہائیکورٹ نے سگریٹ، پان اور تمباکو کی تشہیر سے متعلق درخواست خارج کرتے ہوئے وفاقی حکومت کی جانب سے تشہیر پر پابندی کا نوٹیفکیشن درست قرار دے دیا۔
لاہور ہائیکورٹ کے جسٹس راحیل کامران شیخ نے استعفے سے قبل اپنا آخری فیصلہ جاری کیا، جس میں تمباکو، سگریٹ اور پان کی تشہیر کو غیر قانونی قرار دیا گیا۔
عدالتی فیصلے میں کہا گیا ہے کہ حکومت کے مطابق تمباکو، سگریٹ اور پان کی تشہیر کے منفی نتائج سامنے آئیں گے۔ عوامی صحت کا تحفظ اور صحت مند ماحول کا قیام آئینی تقاضا ہے۔
فیصلے میں کہا گیا کہ تمباکو مصنوعات کی تشہیر کا کوئی مستقل آئینی حق موجود نہیں، جبکہ اشتہارات پر پابندی سے غیر قانونی تجارت کا خدشہ بھی موجود نہیں۔
یہ بھی پڑھیں:طورخم سرحد غیرقانونی افغانیوں کی بے دخلی کیلئے کھل گئی، دوطرفہ تجارت بدستور بند
لاہور ہائیکورٹ نے مشترکہ مفادات کونسل سے رجوع نہ کرنے کا آئینی اعتراض بھی مسترد کردیا۔ عدالت نے قرار دیا کہ حکومتی نوٹیفکیشن میں کوئی غیر قانونی چیز نہیں پائی گئی۔
عدالت نے کہا کہ ہر شہری کو کاروبار اور تجارت کرنے کا آئینی حق حاصل ہے، تاہم اس حق کو عوامی صحت کے تحفظ کے لیے قانون کے تحت محدود کیا جاسکتا ہے۔
لاہور ہائیکورٹ نے تمباکو کی تشہیر پر پابندی سے متعلق وفاقی حکومت کا نوٹیفکیشن برقرار رکھتے ہوئے درخواست خارج کردی۔
