پشاور (پاک ترک نیوز )خیبر پختونخوا میں 30 اگست سے اب تک جاری تیز بارشوں کے باعث مختلف حادثات میں 2 افراد جاں بحق جبکہ 3 زخمی ہوگئے۔پی ڈی ایم اے کے مطابق بارشوں کے باعث گھروں کی چھتیں اور دیواریں گرنے سے جاں بحق ہونے والوں میں ایک خاتون اور ایک بچہ شامل ہیں، جبکہ زخمیوں میں ایک مرد، ایک خاتون اور ایک بچہ شامل ہے۔پی ڈی ایم اے کے مطابق صوبے میں مجموعی طور پر 9 گھروں کو نقصان پہنچا، جن میں 5 گھر جزوی جبکہ 4 مکمل طور پر منہدم ہوئے۔
بارشوں سے متعلق حادثات بونیر، مردان، مہمند اور شانگلہ کے اضلاع میں پیش آئے۔پی ڈی ایم اے، ریسکیو 1122، ضلعی انتظامیہ اور متعلقہ ادارے باہمی رابطے میں ہیں، جبکہ امدادی سرگرمیاں جاری ہیں۔
یہ بھی پڑھیں: شام کے ادلب میں بارود سے بھری گاڑی دھماکے سے تباہ، 5 افراد جاں بحق
ڈی جی پی ڈی ایم اے نے شہریوں سے اپیل کی ہے کہ بلا ضرورت سفر سے گریز کریں، حساس سیاحتی مقامات کا رخ نہ کریں اور حکومتی اداروں کی جانب سے جاری الرٹس اور ایڈوائزری پر عمل کریں۔ترجمان پی ڈی ایم اے کے مطابق ایمرجنسی آپریشن سینٹر مکمل طور پر فعال ہے۔ شہری کسی بھی ناخوشگوار واقعے کی اطلاع، موسمی صورتحال سے آگاہی اور دیگر معلومات کے لیے فری ہیلپ لائن 1700 پر رابطہ کرسکتے ہیں۔
