اسلام آباد ( پاک ترک نیوز) مرکزی ڈائریکٹوریٹ آف نیشنل سیونگز نے مالی سال 2026-27 کے آغاز پر شاندار کارکردگی کا مظاہرہ کرتے ہوئے صرف سات ہفتوں میں 313 ارب روپے کی بچتیں جمع کرلیں۔سی ڈی این ایس کے مطابق یکم جولائی سے 20 اگست 2026 تک ادارے نے 313 ارب روپے متحرک کیے، جو اس عرصے کے لیے مقررہ ہدف کے برابر ہیں۔ حکام کا کہنا ہے کہ یہ کارکردگی نئے مالی سال کے لیے مضبوط آغاز ہے۔
حکام کے مطابق ادارے کی بہتر کارکردگی کی بڑی وجوہات میں ادارہ جاتی استعداد میں بہتری، سرمایہ کاروں کے اعتماد میں اضافہ اور حکومت کی ضمانت یافتہ محفوظ بچت اسکیموں کی مسلسل طلب شامل ہیں۔ابتدائی ہدف مقررہ مدت سے پہلے حاصل ہونے کے بعد سی ڈی این ایس نے مالی سال 2026-27 کے لیے مجموعی طور پر ایک کھرب 53 ارب روپے یعنی 1.53 ٹریلین روپے کی بچتیں جمع کرنے کا ہدف مقرر کیا ہے۔
یہ بھی پڑھیں: لاہور،پولیس اہلکاروں کی ٹارگٹ کلنگ ،دہشت گرد طارق گرفتار
حکام کے مطابق اس ہدف کا مقصد ملک میں قومی بچت کو فروغ دینا، سرمایہ کاری کے مواقع بڑھانا اور شہریوں کو باقاعدہ مالیاتی مصنوعات تک رسائی فراہم کرنا ہے۔سی ڈی این ایس اپنی اسلامک فنانس پورٹ فولیو کو بھی وسعت دینے پر توجہ دے رہا ہے۔ شریعہ کمپلائنٹ بچت اسکیموں کو ادارے کی حکمت عملی کا اہم حصہ بنایا گیا ہے تاکہ سرمایہ کاروں کے وسیع طبقے کو راغب کیا جاسکے۔
