انقرہ ( پاک ترک نیوز) ترکیہ نے چاند، مریخ اور دیگر خلائی مقامات کی پُرامن اور شفاف تحقیق کے لیے قائم آرٹیمس ایکارڈز پر دستخط کردیے، جس کے بعد ترکیہ اس عالمی اتحاد کا 71واں رکن بن گیا ہے۔
امریکی خلائی ادارے ناسا کے ہیڈکوارٹرز واشنگٹن میں ہونے والی تقریب کی میزبانی ناسا کے ایڈمنسٹریٹر جیرڈ آئزک مین نے کی۔ترکیہ کی جانب سے وزیر صنعت و ٹیکنالوجی محمود فاتح کاجر نے آرٹیمس ایکارڈز پر دستخط کیے۔ تقریب میں ترک خلائی ایجنسی کے صدر یوسف کیراچ اور امریکی محکمہ خارجہ کے ڈپٹی اسسٹنٹ سیکریٹری کونر ٹاملسن بھی شریک ہوئے۔
ناسا کے ایڈمنسٹریٹر جیرڈ آئزک مین نے ترکیہ کو آرٹیمس ایکارڈز کا نیا رکن بننے پر خوش آمدید کہتے ہوئے کہا کہ ناسا چاند پر مستقل انسانی موجودگی کے قیام اور مستقبل میں مریخ پر انسانی مشنز کی بنیاد رکھنے کے لیے عالمی شراکت داروں کے ساتھ کام کررہا ہے۔انہوں نے کہا کہ آرٹیمس ایکارڈز پر دستخط کرنے والے ممالک مستقبل کے چاند مشنز میں سائنسی آلات، ٹیکنالوجی، کیوب سیٹس اور دیگر صلاحیتوں کے ذریعے اپنا کردار ادا کرسکتے ہیں۔ترکیہ کی خلائی میدان میں پیش رفت بھی تیزی سے جاری ہے۔ 2024 میں ترکیہ کے پہلے خلا باز الپر گیزراوجی نے ایکسیوم مشن 3 کے ذریعے بین الاقوامی خلائی اسٹیشن کا سفر کیا اور ناسا کے خلا بازوں کے ساتھ سائنسی تحقیق میں حصہ لیا۔
اسی سال ترکیہ کے دوسرے خلا باز توا اتاسیور نے ورجن گیلکٹک 07 کے ذیلی مداری مشن میں شرکت کی اور مختلف تجربات کیے۔ترکیہ جلد اپنا پہلا قمری مشن AYAP-1 بھی روانہ کرنے کی تیاری کررہا ہے، جس کے ذریعے وہ چاند تک اپنے سیٹلائٹ مشن پہنچانے والے ممالک کی فہرست میں شامل ہوجائے گا۔ترکیہ رواں سال اکتوبر میں انطالیہ میں انٹرنیشنل ایسٹروناٹیکل کانگریس کی میزبانی بھی کرے گا، جس میں آرٹیمس ایکارڈز پر دستخط کرنے والے متعدد ممالک کے نمائندوں کی شرکت متوقع ہے۔
یہ بھی پڑھیں: ترکیہ کے جدید کروز میزائل ’چاکر‘ کا زمینی لانچنگ ٹیسٹ کامیاب
آرٹیمس ایکارڈز کا آغاز 2020 میں ناسا، امریکی محکمہ خارجہ اور سات بانی ممالک نے کیا تھا۔ اس کا مقصد چاند، مریخ اور دیگر خلائی مقامات کی محفوظ، پُرامن اور شفاف تحقیق کے لیے مشترکہ اصول وضع کرنا ہے۔معاہدے کے تحت رکن ممالک پُرامن اور شفاف خلائی تحقیق، ضرورت مندوں کو امداد کی فراہمی، سائنسی معلومات تک رسائی، ایک دوسرے کے خلائی مشنز میں مداخلت سے گریز اور تاریخی خلائی مقامات و آثار کے تحفظ کے اصولوں پر کاربند رہنے کا عہد کرتے ہیں۔
