لاہور( پاک ترک نیوز) پنجاب حکومت نے سکیورٹی خدشات کے پیشِ نظر صوبے بھر میں دفعہ 144 کے نفاذ میں توسیع کرتے ہوئے کھلی فضا میں ڈرون اڑانے پر مکمل پابندی عائد کردی۔محکمہ داخلہ پنجاب کے مطابق آؤٹ ڈور ڈرون اڑانے پر عائد پابندی میں مزید 30 روز کی توسیع کی گئی ہے۔ سیکریٹری داخلہ پنجاب نے یہ پابندی ضابطہ فوجداری 1898 کے سیکشن 144(6) کے تحت عائد کی۔
حکومت کے مطابق ہالز اور مارکیز کے اندر تقریبات کے دوران چھوٹے ڈرونز کے محدود استعمال کی اجازت ہوگی، تاہم ان کے محفوظ استعمال کی ذمہ داری تقریب کے منتظمین پر عائد ہوگی۔انٹیلیجنس اور قانون نافذ کرنے والے اداروں کو ڈرون پر پابندی سے مستثنیٰ قرار دیا گیا ہے۔
یہ بھی پڑھیں: ایران کو معیشت سے الگ کرنے کی مہم کے نتائج امریکا بھگتے گا،باقر قالیباف
محکمہ داخلہ نے زرعی، آبپاشی اور تحقیقی مقاصد کے لیے ڈرون کے محفوظ استعمال کی تحریری اجازت دینے کے لیے ضلعی سطح پر سیف ڈرون یوزیج کمیٹی تشکیل دے دی ہے۔ کمیٹی کی تحریری اجازت سے ڈرون کا استعمال پابندی سے مستثنیٰ ہوگا۔حکومت پنجاب کا کہنا ہے کہ عوامی تحفظ، امن و امان کا قیام اور املاک کی حفاظت اولین ترجیحات ہیں۔پنجاب بھر میں انتظامیہ اور پولیس کو دفعہ 144 کے احکامات پر من و عن عملدرآمد یقینی بنانے کی ہدایت کردی گئی ہے۔
