لاہور( پاک ترک نیوز) وزیراعلیٰ پنجاب مریم نواز شریف نے گوجرانوالہ ییلو لائن ماس ٹرانزٹ منصوبے کی تکمیل کے لیے مارچ 2027 کی ڈیڈ لائن مقرر کرتے ہوئے منصوبے کو ہر صورت مقررہ وقت میں مکمل کرنے کی ہدایت کردی۔وزیراعلیٰ پنجاب کی زیر صدارت خصوصی اجلاس میں گوجرانوالہ اور فیصل آباد ماس ٹرانزٹ منصوبوں پر پیشرفت کا تفصیلی جائزہ لیا گیا۔ مریم نواز شریف نے دونوں منصوبوں کی پیشرفت کا ڈرون فوٹیج کے ذریعے بھی معائنہ کیا۔
وزیراعلیٰ نے منصوبوں پر کام تین شفٹوں میں جاری رکھنے کے لیے ضروری اقدامات کرنے کی ہدایت کرتے ہوئے کہا کہ ماس ٹرانزٹ منصوبوں کی ٹائم لائن کسی صورت آگے نہیں جانی چاہیے۔
بریفنگ میں بتایا گیا کہ 31.5 کلومیٹر طویل گوجرانوالہ ییلو لائن پر 25 اسٹیشنز بنائے جائیں گے، جن میں 2 انڈر گراؤنڈ اسٹیشنز شامل ہوں گے۔ منصوبے کے تحت 12 انڈر پاسز، 35 کلومیٹر سروس لائن اور سگنل فری یوٹرنز بھی تعمیر کیے جائیں گے۔گوجرانوالہ ییلو لائن پر تقریباً ایک تہائی کام مکمل ہونے کے قریب ہے، جبکہ 1233 بجلی کے پولز اور 552 ٹرانسفارمرز منتقل کیے جاچکے ہیں۔ منصوبے کے لیے 15 ہزار فٹ سیوریج، 12 ہزار فٹ واٹر سپلائی اور 11 ہزار فٹ گیس پائپ لائن بچھائی جائے گی۔
بریفنگ کے مطابق گوجرانوالہ ماس ٹرانزٹ سسٹم کے لیے 62 کلومیٹر طویل ڈرین کی تعمیر کا 40 فیصد کام مکمل ہوچکا ہے۔فیصل آباد ماس ٹرانزٹ سسٹم 20.3 کلومیٹر طویل ہوگا، جس میں 11.1 کلومیٹر اوور ہیڈ برج تعمیر کیے جائیں گے۔ منصوبے کے لیے 1835 درخت ری پلانٹ کیے گئے ہیں، جبکہ 15 کلومیٹر سوئی گیس لائن اور 12 بس اسٹاپ بھی تعمیر کیے جائیں گے۔
یہ بھی پڑھیں: تھر کول ریلوے رابطہ منصوبہ 60 فیصد مکمل، دسمبر 2026 تک تکمیل کا ہدف
مریم نواز شریف نے ترقیاتی منصوبوں کے دوران درختوں کی حفاظت یقینی بنانے کی ہدایت کرتے ہوئے کہا کہ پنجاب میں ترقیاتی منصوبوں کے ساتھ ماحول کا تحفظ بھی ترجیح ہے۔ گوجرانوالہ اور فیصل آباد ماس ٹرانزٹ منصوبوں میں تقریباً 5 ہزار درختوں کی ری پلانٹیشن کا ریکارڈ بھی پیش کیا گیا۔وزیراعلیٰ پنجاب نے کہا کہ حکومت کو شہریوں کو درپیش مشکلات کا اندازہ ہے، اس لیے ماس ٹرانزٹ منصوبوں کی بروقت تکمیل ضروری ہے۔ انہوں نے ہدایت کی کہ کام جلد از جلد مکمل کیا جائے تاکہ شہریوں کو مزید تکلیف کا سامنا نہ کرنا پڑے۔
