اسلام آباد(پاک ترک نیوز )پرائیویٹ حج سکیم 2027 کے لیے بکنگ کا آغاز ہوگیا، وزارتِ مذہبی امور نے عازمین کو ہدایت کی ہے کہ حج پیکج کی رقم کسی نجی آپریٹر یا غیر مجاز ایجنٹ کو براہ راست ادا نہ کی جائے۔
ذرائع وزارتِ مذہبی امور کے مطابق پرائیویٹ حج سکیم کی بکنگ اور ادائیگی صرف پاک حج ایپ اور حج پورٹل کے ذریعے قابل قبول ہوگی۔ پہلی مرتبہ پرائیویٹ حج کی بکنگ اور ادائیگی کا عمل براہ راست نجی آپریٹرز کے بجائے وزارتِ مذہبی امور کے توسط سے جاری کیا گیا ہے۔
وزارتِ مذہبی امور اب پرائیویٹ حج سکیم کے پیکجز، معاہدوں، ادائیگیوں اور حج آپریشن کی نگرانی کرے گی۔ عازمین حج پورٹل یا پاک حج ایپ کے ذریعے مجاز نجی کمپنی کا انتخاب کرسکیں گے، جبکہ حج پیکج کا انتخاب بھی اسی نظام کے ذریعے کیا جائے گا۔
ذرائع کے مطابق پرائیویٹ حج سکیم کے لیے عازمین صرف پاک حج پورٹل کے ذریعے مجاز کمپنی کا انتخاب کریں اور کسی غیر مجاز ایجنٹ یا فرد کو رقم ادا کرنے سے گریز کریں۔ غیر مجاز افراد کو ادائیگی کی صورت میں عازمین خود ذمہ دار ہوں گے۔
پرائیویٹ حج سکیم کے تحت رواں سال 71 ہزار 696 پاکستانی عازمین حج ادا کریں گے، جبکہ پاک حج ایپ پر ایک لاکھ 5 ہزار سے زائد پرائیویٹ عازمین پہلے ہی رجسٹریشن کراچکے ہیں۔
