لندن(پاک ترک نیوز ) انگلینڈ کے خلاف پہلے ٹیسٹ میں بھاری شکست کے بعد پاکستان ٹیم میں دوسرے ٹیسٹ کے لیے اہم تبدیلیاں متوقع ہیں۔ سیریز کا دوسرا ٹیسٹ 27 اگست سے لارڈز میں شروع ہوگا۔
ذرائع کے مطابق لندن پہنچنے کے بعد مقامی کنڈیشنز کا جائزہ لینے کے بعد پاکستان کی پلیئنگ الیون کو حتمی شکل دی جائے گی۔ لیڈز ٹیسٹ میں بڑے مارجن سے شکست کے بعد ٹیم مینجمنٹ مختلف آپشنز پر غور کر رہی ہے۔
ذرائع کا کہنا ہے کہ وکٹ کیپر بیٹر محمد رضوان کو لارڈز ٹیسٹ میں آرام دیے جانے کا امکان ہے، جبکہ بابر اعظم کی ٹیم میں واپسی کے لیے مینجمنٹ پُرامید ہے۔ بابر اعظم انگلی کی انجری کے باعث پہلے ٹیسٹ کا حصہ نہیں بن سکے تھے۔
اگر بابر اعظم مکمل فٹ ہوکر ٹیم میں واپس آتے ہیں تو اذان اویس کو پلیئنگ الیون سے باہر کیا جا سکتا ہے۔
ذرائع کے مطابق لارڈز کی کنڈیشنز کو مدنظر رکھتے ہوئے پاکستان دو اسپنرز کے ساتھ میدان میں اترنے پر بھی غور کر رہا ہے۔ تیز رفتاری کے باعث فاسٹ بولر عبید شاہ کو دوسرے ٹیسٹ میں موقع دیے جانے کا امکان ہے۔
