لاہور( پاک ترک نیوز) فراری کی پہلی مکمل برقی گاڑی۔۔۔ جسے لانچ ہوتے ہی شدید تنقید کا سامنا کرنا پڑا، ناقدین نے اسے فراری کی شناخت کے خلاف قرار دیا۔۔۔ لیکن یہی گاڑی نیلامی میں ایسی قیمت پر فروخت ہوئی کہ دنیا دنگ رہ گئی!
فراری کی برقی گاڑی لُوچے نے نیلامی میں چار کروڑ ڈالر، یعنی پاکستانی تقریباً 11 ارب روپے میں فروخت ہو کر نئی تاریخ رقم کر دی۔امریکی ریاست کیلیفورنیا میں ہونے والی نیلامی میں فروخت ہونے والی یہ نئی گاڑی کی سب سے مہنگی فروخت کا نیا ریکارڈ ہے۔
دلچسپ بات یہ ہے کہ لُوچے اپنی عام قیمت سے 35 گنا سے بھی زیادہ رقم میں فروخت ہوئی۔اور اس سے بھی حیران کن بات۔۔۔ اس گاڑی کا خریدار کون ہے؟نیلام گھر نے نام ظاہر کرنے سے انکار کر دیا۔لُوچے کا تصور برطانوی ڈیزائنر سر جونی آئیو نے پیش کیا، جنہیں آئی فون کے ڈیزائن سے عالمی شہرت ملی۔فراری نے مئی میں جب اپنی پہلی مکمل برقی گاڑی متعارف کرائی تو سوشل میڈیا پر طوفان برپا ہوگیا۔ناقدین نے کہا۔۔۔یہ وہ فراری نہیں جسے دنیا جانتی ہے!
یہ بھی پڑھیں: سندھ حکومت کا پبلک سروس گاڑیوں کے خلاف کریک ڈاؤن کا فیصلہ
پانچ نشستیں۔۔۔ بیٹری سے چلنے والی گاڑی۔۔۔ اور روایتی فراری ڈیزائن سے مختلف شکل۔۔۔ناقدین نے یہاں تک کہہ دیا کہ فراری نے اپنی اصل شناخت ہی کھو دی۔گاڑی کی تقریب رونمائی بھی معمولی نہیں تھی۔ اٹلی کے صدر سرجیو ماتاریلا اور مسیحیوں کے روحانی پیشوا پوپ لیو کو بھی فراری کی پہلی مکمل برقی گاڑی دیکھنے کے لیے مدعو کیا گیا۔لیکن افتتاح کے اگلے ہی دن فراری کے حصص کی قیمت آٹھ فیصد گر گئی۔سوشل میڈیا پر میمز کی بھرمار ہوگئی۔۔کسی نے اسے بے ڈھنگا قرار دیا تو کسی نے طنز کیا کہ اینزو فراری قبر سے واپس آکر کمپنی سنبھال لیں گے!
فراری کے سابق سربراہ لوکا کورڈیرو دی مونتیزیمولو نے بھی لُوچے کو تنقید کا نشانہ بنایا اور کہا کہ یہ گاڑی فراری جیسی محسوس نہیں ہوتی۔آسٹریلیا کے معروف فراری کلیکٹر شان بیکر نے تو اسے ’ناکام‘ تک قرار دے دیا۔اٹلی کے نائب وزیراعظم ماتیو سالوینی بھی پیچھے نہ رہے اور سوال اٹھایا۔۔۔کیا یہی جدت ہے؟لیکن فراری نے تنقید کو نظر انداز کر دیا۔کمپنی کے مطابق لُوچے صرف ایک نئی گاڑی نہیں بلکہ فراری کے مستقبل کی جانب ایک بڑا قدم ہےاور کارکردگی دیکھی جائے تو یہ کسی سے کم نہیں۔صرف تقریباً ڈھائی سیکنڈ میں صفر سے 96 کلومیٹر فی گھنٹہ کی رفتار۔۔۔اور زیادہ سے زیادہ رفتار 190 میل فی گھنٹہ سے بھی زیادہ۔۔ یعنی شکل پر بحث اپنی جگہ۔۔۔ رفتار میں فراری اب بھی فراری ہے!
لُوچے کی خصوصی نیلامی سے حاصل ہونے والی پوری رقم فراری فاؤنڈیشن کے تعلیمی پروگراموں کے لیے مختص کی جائے گی۔نیلام ہونے والی گاڑی میں منفرد سفید رنگ، خصوصی پہیے اور حسبِ ضرورت تیار کیے گئے پرزے شامل تھے۔
