کراچی (پاک ترک نیوز) سندھ حکومت نے صوبے بھر میں پبلک سروس گاڑیوں کے خلاف جامع انفورسمنٹ مہم اور کریک ڈاؤن کا فیصلہ کر لیا۔صوبائی وزیر شرجیل انعام میمن نے ہدایت کی ہے کہ بغیر ڈیجیٹائزڈ روٹ پرمٹ، درست فٹنس سرٹیفکیٹ اور لازمی فائر ایکسٹنگوشر کے چلنے والی گاڑیوں کے خلاف سخت کارروائی کی جائے۔
شرجیل انعام میمن کے مطابق تمام پبلک سروس گاڑیوں کے ڈیجیٹائزڈ روٹ پرمٹس کی تصدیق کی جائے گی، جبکہ دستی روٹ پرمٹس کو غیر مؤثر تصور کرتے ہوئے منسوخ کیا جائے گا۔صوبائی وزیر نے کہا کہ متعدد پبلک سروس گاڑیاں تاحال ڈیجیٹائزڈ روٹ پرمٹ اور درست فٹنس سرٹیفکیٹ کے بغیر چل رہی ہیں، جبکہ بعض گاڑیوں میں فائر ایکسٹنگوشر بھی موجود نہیں۔ ایسی خلاف ورزیاں مسافروں کی حفاظت کے لیے سنگین خطرہ ہیں۔
صوبائی و ریجنل ٹرانسپورٹ اتھارٹیز، تمام ڈی آر ٹی ایز اور موٹر وہیکل انسپیکشن ونگ کو فوری طور پر سخت چیکنگ اور انفورسمنٹ مہم شروع کرنے کی ہدایات جاری کر دی گئی ہیں۔بغیر درست فٹنس سرٹیفکیٹ چلنے والی گاڑیوں کو فوری طور پر تحویل میں لینے، جبکہ موٹر وہیکل انسپکٹرز کو اچانک معائنے اور خلاف ورزی کی صورت میں کارروائی کی ہدایت کی گئی ہے۔شرجیل میمن نے کہا کہ تمام پبلک سروس گاڑیوں میں مقررہ حفاظتی معیار کے مطابق فعال فائر ایکسٹنگوشر لازمی ہوگا۔
یہ بھی پڑھیں: بانی پی ٹی آئی کی ہسپتال منتقلی کا معاملہ، وفاق کی سپریم کورٹ میں دوبارہ نظرثانی درخواست دائر
خلاف ورزی کرنے والوں کے خلاف جرمانے، روٹ پرمٹ کی معطلی اور ضرورت پڑنے پر لائسنس منسوخی سمیت قانونی کارروائی کی جائے گی، جبکہ بار بار خلاف ورزی کرنے والے آپریٹرز کے نام بلیک لسٹنگ کے لیے تجویز کیے جائیں گے۔صوبائی وزیر نے افسران کو ہر دو ہفتے بعد کی گئی کارروائی، خلاف ورزی کرنے والوں کی جامع فہرست اور مزید بہتری کے لیے سفارشات پر مشتمل تفصیلی رپورٹ محکمہ ٹرانسپورٹ کو جمع کرانے کا حکم بھی دے دیا۔
