لاہور( پاک ترک نیوز) پنجاب میں لیول تھری پوسٹ گریجویٹ میڈیکل اور ڈینٹل پروگرامز میں داخلوں کے لیے پوسٹ گریجویٹ انٹری ٹیسٹ، پی گیٹ 2026، 25 اکتوبر کو ہوگا۔
یونیورسٹی آف ہیلتھ سائنسز لاہور نے پی گیٹ کے لیے آن لائن رجسٹریشن پورٹل کھول دیا ہے۔ امیدوار آن لائن رجسٹریشن کے لیے UHS PGET آن لائن پورٹل پر درخواست جمع کراسکتے ہیں۔رجسٹریشن کی آخری تاریخ 22 ستمبر 2026 مقرر کی گئی ہے، جبکہ جنوری 2027 کی انڈکشن میں داخلے کے لیے پی گیٹ 2026 پاس کرنا لازمی ہوگا۔
امیدواروں کو کامیابی کے لیے کم از کم 75 پرسنٹائل حاصل کرنا ہوگا۔ انٹری ٹیسٹ بیک وقت لاہور، فیصل آباد، ملتان اور راولپنڈی میں منعقد ہوگا۔
ایم ایس، ایم ڈی، ایم ڈی ایس اور ایف سی پی ایس میں داخلوں کے لیے ٹیسٹ دو پرچوں پر مشتمل ہوگا۔ ہر پرچے کے 100 نمبر ہوں گے اور دورانیہ دو گھنٹے ہوگا۔ دونوں پرچے ایک ہی روز لیے جائیں گے۔پہلے پرچے میں میڈیکل اور ڈینٹل گریجویٹس کے لیے الگ الگ 100 ایم سی کیوز ہوں گے، جبکہ دوسرے پرچے میں امیدوار کی منتخب کردہ سپیشلٹی سے متعلق 100 ایم سی کیوز شامل ہوں گے۔ایم بی بی ایس گریجویٹس کے لیے پیتھالوجی، آپتھلمولوجی، پیڈیاٹرک میڈیسن، گائناکالوجی، اینستھیزیا، ای این ٹی، سائیکاٹری، ریڈیالوجی اور میڈیسن اینڈ الائیڈ سمیت مختلف سپیشلٹیز شامل ہیں۔سرجری اینڈ الائیڈ کی سپیشلٹیز کو دو گروپس میں تقسیم کیا گیا ہے۔ پہلے گروپ میں جنرل سرجری، پیڈیاٹرک سرجری، یورولوجی اور پلاسٹک سرجری جبکہ دوسرے گروپ میں جنرل، کارڈیک، آرتھوپیڈک، نیوروسرجری اور تھراسک سرجری شامل ہیں۔
یہ بھی پڑھیں: خلیجی ممالک سے 21 ہزار 951 پاکستانی ڈی پورٹ
بی ڈی ایس گریجویٹس کے لیے پروستھوڈونٹکس، آپریٹو ڈینٹسٹری، پیریوڈونٹولوجی، اورل اینڈ میکسیلوفیشل سرجری اور آرتھوڈونٹکس کی سپیشلٹیز شامل ہیں۔پی گیٹ میں شرکت کے لیے امیدوار کے پاس ایم بی بی ایس یا بی ڈی ایس ڈگری، ہاؤس جاب کمپلیشن سرٹیفکیٹ اور پی ایم ڈی سی کی مستقل رجسٹریشن ہونا ضروری ہے۔اوپن میرٹ اور اسپیشل افراد کوٹے پر داخلے کے لیے پنجاب کا ڈومیسائل لازمی قرار دیا گیا ہے، جبکہ درخواست جمع کراتے وقت امیدوار کی عمر 40 سال سے زیادہ نہیں ہونی چاہیے۔
پی گیٹ 2026 کی رجسٹریشن فیس 10 ہزار روپے مقرر کی گئی ہے۔ یونیورسٹی آف ہیلتھ سائنسز نے امیدواروں کی رہنمائی کے لیے تفصیلی نوٹس بھی جاری کردیا ہے۔
