کوئٹہ ( پاک ترک نیوز) بلوچستان کے علاقے پنجگور، کلی سوران میں سیکیورٹی فورسز نے آپریشن ردالفتنہ 3 کے تحت فتنہ الہندوستان کے خلاف کامیاب انٹیلی جنس بیسڈ آپریشن کیا ہے، جس میں 5 دہشتگرد ہلاک جبکہ متعدد زخمی ہوگئے۔
سیکیورٹی ذرائع کے مطابق ہلاک دہشتگرد موٹر سائیکلوں پر سوار ہوکر ایک بڑی دہشتگرد کارروائی کی منصوبہ بندی میں مصروف تھے۔ فورسز نے انٹیلی جنس معلومات کی بنیاد پر کارروائی کرتے ہوئے جدید ٹیکنالوجی اور ہتھیاروں کی مدد سے دہشتگردوں کو کامیابی سے نشانہ بنایا۔
ذرائع کے مطابق کارروائی کے بعد ہلاک دہشتگردوں کے قبضے سے بھاری مقدار میں جدید اسلحہ اور گولہ بارود برآمد کیا گیا۔سیکیورٹی ذرائع کا کہنا ہے کہ دہشتگردوں کے زیر استعمال 3 گاڑیاں، 2 موٹر سائیکلیں، آئی ای ڈی ڈیوائس اور کالعدم تنظیم کا جھنڈا بھی برآمد ہوا۔
ذرائع کے مطابق ہلاک دہشتگرد مقامی افراد کو لوٹنے، بھتہ خوری، اغوا برائے تاوان، ٹارگٹ کلنگ اور خودکش حملوں کی منصوبہ بندی میں ملوث تھے۔
یہ بھی پڑھیں: بھارت کی ایک اور سفارتی کارروائی، نئی دہلی میں پاکستانی ہائی کمیشن کے باہر رکاوٹیں ہٹا دی گئیں
سیکیورٹی فورسز نے بلوچستان میں دہشتگردی کے مکمل خاتمے کے عزم کا اظہار کرتے ہوئے کہا ہے کہ صوبے میں امن و استحکام کو نقصان پہنچانے کی ہر کوشش ناکام بنائی جائے گی اور آخری دہشتگرد کے خاتمے تک کارروائیاں جاری رہیں گی۔
