اسلام آباد ( پاک ترک نیوز) آزاد کشمیر کے انتخابات میں مسلم لیگ ن نے واضح برتری حاصل کرلی، لیگی امیدواروں نے 25 نشستوں پر کامیابی حاصل کرلی۔ وزیراعظم کے مشیر رانا ثناء اللہ نے طارق فضل چودھری کے ہمراہ نیوز کانفرنس کرتے ہوئے کہا کہ مسلم لیگ ن آزاد کشمیر میں اپنی اکثریت کی بنیاد پر حکومت بنائے گی۔
رانا ثناء اللہ کا کہنا تھا کہ آزاد کشمیر کے عوام نے میاں نواز شریف کی جماعت کو واضح مینڈیٹ دیا ہے۔ عوام نے تعمیر و ترقی کے لیے مسلم لیگ ن کا انتخاب کیا ہے، کیے گئے تمام وعدے پورے کیے جائیں گے۔
انہوں نے کہا کہ آزاد کشمیر میں پنجاب کی طرز پر تعمیر و ترقی کا آغاز کیا جائے گا اور علاقے کی پسماندگی کے خاتمے کے لیے عملی اقدامات کیے جائیں گے۔
وزیراعظم کے مشیر کا کہنا تھا کہ آزاد کشمیر کے عوام کو بہتر سہولیات کی فراہمی اور ترقیاتی عمل کو تیز کرنا مسلم لیگ ن کی ترجیحات میں شامل ہے۔
رانا ثناء اللہ نے کہا کہ پرامن احتجاج ہر شہری کا حق ہے، تاہم آزاد کشمیر میں امن و امان کو بہتر بنانا حکومت کی اولین ترجیح ہوگی۔
یہ بھی پڑھیں: اسحاق ڈار اور ترک وزیر خارجہ کا ٹیلیفونک رابطہ
دوسری جانب ایل اے 14 سے منتخب رکن اسمبلی ساجد اقبال نے مسلم لیگ ن میں شمولیت کا اعلان کردیا ہے۔
مسلم لیگ ن کی جانب سے آزاد کشمیر میں حکومت بنانے کے دعوے کے بعد اب حکومت سازی کے لیے مشاورت اور سیاسی رابطوں کا مرحلہ مزید اہم ہوگیا ہے۔
