لاہور( پاک ترک نیوز) لاہور کے علاقے بادامی باغ میں پولیس اہلکاروں کی ٹارگٹ کلنگ کا مقدمہ درج کرلیا گیا۔ فائرنگ کے واقعے میں سب انسپکٹر عدیل اور ہیڈ کانسٹیبل اسد شہید ہوئے تھے۔
پولیس کی مدعیت میں درج مقدمے میں انسدادِ دہشت گردی، قتل، اقدامِ قتل سمیت آٹھ دفعات شامل کی گئی ہیں۔ ایف آئی آر کے مطابق پولیس ٹیم کو دہشت گردوں کی موجودگی کی اطلاع ملی، جس پر اہلکاروں نے بادامی باغ کے علاقے میں کارروائی کے لیے چھاپہ مارا۔
ایف آئی آر کے مطابق پولیس ٹیم کارروائی میں مصروف تھی کہ فیاض بٹ اور اس کے دو ساتھیوں نے پولیس اہلکاروں پر فائرنگ کردی۔
فائرنگ کے نتیجے میں سب انسپکٹر عدیل اور ہیڈ کانسٹیبل اسد شدید زخمی ہوئے، تاہم دونوں اہلکار زخموں کی تاب نہ لاتے ہوئے شہید ہوگئے۔
واقعے کے بعد پولیس کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کردیا۔ پولیس حکام کے مطابق حملہ آوروں کی گرفتاری کے لیے مختلف پہلوؤں سے تحقیقات جاری ہیں۔پولیس نے مقدمے میں دہشت گردی سمیت سنگین نوعیت کی دفعات شامل کرتے ہوئے ملزمان کے خلاف کارروائی شروع کردی ہے۔ تفتیشی ٹیم واقعے کے شواہد اکٹھے کرنے کے ساتھ ساتھ حملہ آوروں کی شناخت، سہولت کاری اور ممکنہ نیٹ ورک سے متعلق بھی تحقیقات کر رہی ہے۔
یہ بھی پڑھیں: شرپسندی کے راستے سے کچھ حاصل نہیں ہوگا، ریاست کے دروازے کھلے ہیں: سرفراز بگٹی
پولیس حکام کا کہنا ہے کہ قانون نافذ کرنے والے اہلکاروں پر حملے میں ملوث عناصر کو قانون کے کٹہرے میں لایا جائے گا اور شہید اہلکاروں کی قربانی رائیگاں نہیں جائے گی۔
