کوئٹہ ( پاک ترک نیوز) وزیراعلیٰ بلوچستان سرفراز بگٹی نے کہا ہے کہ شرپسندی کے راستے سے کچھ حاصل نہیں ہوگا، ریاست کے دروازے سب کے لیے کھلے ہیں، مذاکرات کے ذریعے مسائل حل کیے جا سکتے ہیں۔
کوئٹہ میں یومِ آزادی کے موقع پر پرچم کشائی کی تقریب سے خطاب کرتے ہوئے سرفراز بگٹی نے کہا کہ صوبائی حکومت نوجوانوں کو سیدھے راستے پر لانے کے لیے اقدامات کر رہی ہے۔
وزیراعلیٰ بلوچستان نے کہا کہ ہماری افواج دہشت گردی کے مقابلے میں ایک قدم بھی پیچھے نہیں ہٹیں گی۔ دہشت گردی کے خلاف جنگ میں ریاست اور سیکیورٹی فورسز کا عزم غیر متزلزل ہے۔
یہ بھی پڑھیں: پاکستان ہمیشہ امن، مذاکرات، تعاون اور باہمی احترام کا علمبردار رہا ہے،اسحاق ڈار
انہوں نے کہا کہ بلوچستان کے نوجوان ملک کا قیمتی سرمایہ ہیں، انہیں تعلیم، ہنر اور ترقی کے مواقع فراہم کرنا حکومت کی ترجیحات میں شامل ہے۔
یومِ آزادی کی پرچم کشائی کی تقریب میں صوبائی وزراء، ارکانِ اسمبلی اور سرکاری افسران نے شرکت کی، جبکہ طلبہ و طالبات نے ملی نغمے پیش کیے۔
تقریب کے دوران قومی پرچم بلند کیا گیا اور پاکستان کی سلامتی، ترقی اور خوشحالی کے لیے خصوصی دعائیں بھی کی گئیں۔
