لاہور( پاک ترک نیوز) اٹاری واہگہ سرحد پر روزانہ ہونے والی پرچم اتارنے کی تقریب کے دوران پاکستانی رینجرز کے اہلکار کی جانب سے بھارتی فوج کے ایک سینئر افسر کو پیشہ ورانہ فوجی سلامی دینے کی ویڈیو سوشل میڈیا پر وائرل ہوگئی۔
ویڈیو میں دیکھا جا سکتا ہے کہ تقریب کے دوران پاکستانی رینجرز کا اہلکار سرحد کے دوسری جانب موجود بھارتی فوج کے سینئر افسر کو فوجی روایت کے مطابق سلامی پیش کرتا ہے، جس پر بھارتی افسر سر ہلا کر اس کا جواب دیتا ہے۔
یہ منظر ایسے وقت میں سامنے آیا ہے جب دونوں ممالک کے درمیان حالیہ عرصے میں کشیدگی اور لائن آف کنٹرول پر تناؤ کی صورتحال رہی ہے، جس کے باعث ویڈیو نے سوشل میڈیا پر خاصی توجہ حاصل کی۔
دفاعی ماہرین کے مطابق سرحدی تقریبات، پرچم اتارنے کی رسم، فلیگ میٹنگز اور دیگر سرکاری فوجی مواقع پر پیشہ ورانہ آداب اور فوجی روایات کے تحت ایک دوسرے کے عہدے اور وردی کا احترام کیا جاتا ہے۔
یہ بھی پڑھیں: آزاد کشمیر انتخابات: وزیراعظم کی مسلم لیگ (ن) کی کامیابی پر نواز شریف اور امیدواروں کو مبارکباد
سوشل میڈیا صارفین نے بھی اس عمل کو پیشہ ورانہ روایت قرار دیتے ہوئے کہا کہ فوجی سلامی کسی ملک کے بجائے وردی اور عہدے کے احترام کی علامت ہوتی ہے۔ بعض صارفین کے مطابق ایسی تقریبات میں فوجی ضابطے سیاست پر فوقیت رکھتے ہیں، جبکہ دیگر نے اسے دونوں افواج کی پیشہ ورانہ روایات کا مظہر قرار دیا۔
