مظفر آباد (پاک ترک نیوز )مسلم لیگ ن کے قائد نوازشریف نے آزاد کشمیر کا وزیر اعظم بننے کی خواہش ظاہر کردی۔
مظفر آباد میں جلسے سے خطاب کرتے ہوئے قائد مسلم لیگ ن نواز شریف نے کہا کہ میرا دل کرتا ہے الیکشن میں کامیابی ملتی ہے تو شہبازشریف کو کہوں کہ مجھے وزیراعظم آزاد کشمیربنا دیں۔
نواز شریف نے آزاد کشمیر کو اپنا دوسرا گھر قرار دیتے ہوئے کہا کہ میرے لیے آزاد کشمیر بھی اتنا ہی عزیز ہےجتنا پنجاب ہے، آزاد کشمیر، جی بی اور چاروں صوبوں میں ترقیاتی منصوبوں میں تفریق نہیں کی۔
نواز شریف نے کہا اگر آزاد کمشیر میں ہماری حکومت بنی تو ہم یہاں کے سارے مسائل حل کریں گے اور تمام مسائل دور کرکے ہی دم لیں گے، اگر آپ مسلم لیگ ن کو ووٹ دیں گے تو میں ہر 3 مہینے بعد آزاد کشمیر آؤں گا اور خود لوگوں کے مسائل حل کروں گا۔
قائد مسلم لیگ ن نے کہا جب میں وزیراعظم تھا تو آزاد کشمیر کا بجٹ ڈبل کردیا تھا، اگر آزاد کشمیر میں ہماری حکومت بنی تو ہم آزاد کشمیر کا بجٹ 10 گنا بڑھائیں گے، آپ کو معلوم ہےکہ نوازشریف جو وعدہ کرتا ہے وہ پورا کرتا ہے۔
