ٹرمپ کی حماس کو آخری وارننگ، خطرناک نتائج کی دھمکیاں

واشنگٹن(پاک ترک نیوز) امریکی صدر ڈونلڈ ٹرمپ نے یرغمالیوں کی رہائی کے لیے حماس کو آخری وارننگ دیتے ہوئے خطرناک نتائج کی دھمکیاں دے دیں۔
امریکی صدر ڈونلڈ ٹرمپ نے حماس کو آخری وارننگ دیتے ہوئے کہا کہ اسرائیلی مغوی فوری رہا کیے جائیں۔ ہر کوئی مغویوں کی رہائی اور جنگ کا خاتمہ چاہتا ہے۔
ٹرمپ نے کہا کہ اسرائیل میری شرائط مان چکا ہے اور اب حماس کی باری ہے۔ حماس شرائط کو قبول کرے ورنہ خطرناک نتائج سے خبردار کر رہا ہوں۔
امریکی صدر نے کہا کہ یہ میری حماس کو آخری وارننگ ہے۔ اس کے بعد کوئی وارننگ نہیں دوں گا۔ لگتا ہے غزہ کے حوالے سے جلد کوئی معاہدہ ہو جائے گا۔
انہوں نے کہا کہ ہماری اطلاعات کے مطابق 20 زندہ لوگ اور تقریباً 38 لاشیں حماس کے قبضے میں ہیں۔
ٹرمپ نے کہا کہ روس یوکرین کی صورتحال پر خوش نہیں ہوں۔ اس حوالے سے روسی صدر سے جلد بات کروں گا۔ روس یوکرین جنگ میں ہر ہفتے 7 ہزار لوگ مارے جا رہے ہیں۔
انہوں نے کہا کہ ہم نے دنیا میں 7 جنگیں رکوائی ہیں۔ اور یہ تمام جنگیں وہ تھیں جن کو روکنا ناممکن تھا۔ اب تمام فریقین مطمئن ہیں اور وہ خوشی خوشی رہ رہے ہیں۔
حماس نے کہا ہے کہ ہمیں ثالثوں کے ذریعے کچھ تجاویز موصول ہوئی ہیں۔ اور جنگ بندی معاہدے کے لیے امریکی تجاویز پر غور کر رہے ہیں۔