اسلام آباد ( پاک ترک نیوز) ملک بھر میں 9 محرم الحرام کے موقع پر مجالس عزا اور ماتمی جلوسوں کا سلسلہ جاری ہے جبکہ سیکیورٹی کے انتہائی سخت انتظامات کیے گئے ہیں۔ لاہور، کراچی، سکھر سمیت مختلف شہروں میں مرکزی جلوس اپنے روایتی راستوں پر گامزن ہیں۔
یومِ عاشور سے ایک روز قبل 9 محرم الحرام کے موقع پر ملک بھر میں عزاداری کا سلسلہ عروج پر پہنچ گیا ۔ مختلف شہروں میں مجالس عزا منعقد کی جا رہی ہیں جہاں حضرت امام حسینؓ اور شہدائے کربلا کی عظیم قربانیوں کو خراج عقیدت پیش کیا جا رہا ہے۔
لاہور میں 9 محرم کا مرکزی جلوس پانڈو اسٹریٹ سے برآمد ہوا۔ جلوس اپنے مقررہ راستوں سے گزرتا ہوا خیمہ سادات پہنچ کر اختتام پذیر ہوگا۔ جلوس کے راستوں پر سیکیورٹی کے غیر معمولی انتظامات کیے گئے ہیں جبکہ پولیس، رینجرز اور دیگر قانون نافذ کرنے والے اداروں کے اہلکار تعینات ہیں۔
کراچی میں نشتر پارک میں مرکزی مجلس عزا کے انعقاد کے بعد دوپہر کو جلوس شبیہ علم و تابوت برآمد ہوگا۔ جلوس اپنے روایتی راستوں سے ہوتا ہوا شام کے وقت حسینیہ ایرانیاں میں اختتام پذیر ہوگا۔ جلوس کے راستوں پر سیکیورٹی کے فول پروف انتظامات کیے گئے ہیں جبکہ ٹریفک کی روانی برقرار رکھنے کے لیے متبادل راستے بھی مختص کیے گئے ۔
یہ بھی پڑھیں: مریم نواز کا نیا ریکارڈ،تین بڑے ہسپتال افتتاح کے لئے تیار
سکھر میں صدیوں پرانی عزاداری کی روایات آج بھی برقرار ہیں۔ پانچ سو سال قدیم نو ڈھالہ تعزیہ جلوس امام بارگاہ شاہ عراق سے برآمد ہوا۔ یہ تاریخی جلوس مقررہ راستوں سے گزرتا ہوا شام کو میدان کربلا پہنچے گا جہاں عزادار شہدائے کربلا کو پرسہ پیش کریں گے۔
ملک کے دیگر شہروں میں بھی مجالس اور جلوسوں کے سلسلے جاری ہیں۔ انتظامیہ کی جانب سے سیکیورٹی پلان کے تحت سی سی ٹی وی کیمروں، واک تھرو گیٹس، ڈرون نگرانی اور اضافی نفری کی تعیناتی کو یقینی بنایا گیا ہے تاکہ عزاداروں کو مکمل تحفظ فراہم کیا جا سکے۔
