اسلام آباد ( پاک ترک نیوز) مہنگا علاج اور بڑھتے ہوئے طبی اخراجات ہر سال ہزاروں خاندانوں کو شدید مالی مشکلات سے دوچار کر دیتے ہیں، لیکن اب اس حوالے سے ایک بڑی اور خوش آئند پیش رفت سامنے آئی ہے۔
وفاقی حکومت نے صحت سہولت پروگرام کو دوبارہ فعال کرنے کا اعلان کر دیا ہے، جس کے تحت اسلام آباد اور جڑواں شہروں کے مستحق شہری مفت علاج کی سہولیات حاصل کر سکیں گے۔
وفاقی وزیر برائے قومی صحت سید مصطفیٰ کمال کے مطابق کئی برس سے معطل یہ پروگرام دوبارہ شروع کر دیا گیا ہے تاکہ غریب اور کم آمدنی والے افراد کو مہنگے علاج کے بوجھ سے ریلیف فراہم کیا جا سکے۔
حکومت نے اس مقصد کے لیے ایک وسیع طبی نیٹ ورک بھی قائم کر دیا ہے، جس میں اسلام آباد، راولپنڈی اور جڑواں شہروں کے 42 بڑے ہسپتال شامل ہیں۔
اس پروگرام کے تحت رجسٹرڈ مستحق مریض مختلف بیماریوں کے علاج، بڑے آپریشنز، تشخیصی ٹیسٹوں اور دیگر طبی سہولیات سے بلا معاوضہ استفادہ کر سکیں گے۔
حکومت کا کہنا ہے کہ اس اقدام کا مقصد صرف علاج کی سہولیات فراہم کرنا نہیں بلکہ عوام کا صحت کے نظام پر اعتماد بحال کرنا بھی ہے، تاکہ کوئی بھی شہری مالی مشکلات کی وجہ سے علاج سے محروم نہ رہے۔
حکام کے مطابق مستقبل میں اس پروگرام کا دائرہ کار مزید وسیع کرنے پر بھی غور کیا جا رہا ہے تاکہ ملک کے دیگر علاقوں کے شہری بھی اس سہولت سے فائدہ اٹھا سکیں۔
