این ڈی ایم اے کا موسلا دھار بارش اور ژالہ باری کا الرٹ

اسلام آباد ( پاک ترک نیوز) این ڈی ایم اے نے 12 سے 24 گھنٹوں کے دوران ملک کے بیشتر علاقوں میں تیز ہواؤں، گرج چمک کے ساتھ بارش اور بعض مقامات پر ژالہ باری کا الرٹ جاری کر دیا ۔
محکمہ موسمیات کے مطابق اسلام آباد اور پنجاب کے مختلف اضلاع میں تیز ہواؤں اور گرج چمک کے ساتھ بارش جبکہ چند مقامات پر ژالہ باری کا امکان ہے۔ مری، راولپنڈی، اٹک، چکوال، جہلم، سیالکوٹ، گجرات، گوجرانوالہ، نارووال اور منڈی بہاؤالدین میں بارش متوقع ہے۔ لاہور، شیخوپورہ، فیصل آباد، سرگودھا، ساہیوال اور اوکاڑہ میں بھی بارش اور آندھی کی پیشگوئی کی گئی ہے۔
گلگت بلتستان اور آزاد کشمیر کے مختلف علاقوں میں بھی گرج چمک کے ساتھ بارش کا امکان ظاہر کیا گیا ۔ گلگت، اسکردو، ہنزہ، نگر، غذر، دیامر، استور، گھانچے، شگر، کھرمنگ، مظفرآباد، نیلم ویلی، باغ، حویلی، پونچھ اور راولاکوٹ میں بارش متوقع ہے۔
خیبر پختونخوا کے علاقوں چترال، دیر، سوات، صوابی، کالام، مالاکنڈ، مانسہرہ، ایبٹ آباد، پشاور، کوہاٹ اور ڈیرہ اسماعیل خان میں بھی تیز ہواؤں اور گرج چمک کے ساتھ بارش جبکہ کہیں کہیں ژالہ باری کا امکان ہے۔
سندھ کے مختلف علاقوں بشمول کراچی، حیدرآباد، بدین، ٹھٹھہ، جامشورو، میرپورخاص اور سجاول میں بھی بارش اور بعض مقامات پر ژالہ باری کی پیشگوئی کی گئی ہے۔
بلوچستان کے علاقوں کوئٹہ، ژوب، قلعہ سیف اللہ، پشین، چمن، خضدار، قلات، زیارت، سبی، گوادر اور کیچ میں بھی گرج چمک کے ساتھ بارش کا امکان ظاہر کیا گیا ۔
محکمہ موسمیات نے خبردار کیا ہے کہ شمالی علاقوں میں بڑھتے درجہ حرارت کے باعث گلیشیئرز پگھلنے سے گلیشیائی جھیلوں کے پھٹنے، سیلابی ریلوں اور لینڈ سلائیڈنگ کا خدشہ موجود ہے۔ شہریوں کو ہدایت کی گئی ہے کہ وہ گلیشیائی جھیلوں اور خطرناک ڈھلوانوں کے قریب جانے سے گریز کریں۔