اسلام آباد ( پاک ترک نیوز) پاسپورٹ کے نظام میں ڈیجیٹل تبدیلی کی تیاری مکمل کر لی گئی۔۔ پاسپورٹ دفاتر میں مکمل کیش لیس نظام رائج ہو گا اب 21 دن کے بجائے 14 روز میں فراہم کردیا جائے گا۔
بزنس کیٹگری پاسپورٹ کے اجرا کے لیے ورکنگ پیپر اور تیاری شروع کردی گئی ہے اور گھر میں پاسپورٹ ڈلیوری کے نظام کو مؤثر بنایا جائے گا۔15 یوم میں پاسپورٹ دفاتر کو کیش لیس نظام رائج کرنے کی ہدایت کردی گئی ،حکومتی اقدام کے نتیجے میں کے نتیجے میں کیش ادائیگی ختم ہونے سے ایجنٹ مافیا کا خاتمہ ہوگا۔
ڈائریکٹوریٹ آف پاسپورٹس اینڈ امیگریشن نے آئی ٹی ماہرین کے اشتراک سے پاسپورٹ درخواستوں کے عمل کا جامع جائزہ مکمل کر لیا ۔درخواست جمع کروانے سے لے کر پاسپورٹ کے اجرا تک کے تمام مراحل جدید تقاضوں کے مطابق ہوں گے ۔
فیصلہ ڈائریکٹر جنرل امیگریشن اینڈ پاسپورٹس محمد علی رندھاوا کی زیر صدارت ایک اہم اجلاس میں کیا گیا، جس میں ڈیجیٹل تبدیلی کے لیے متعدد اصلاحات کی منظوری دی گئی۔
یہ بھی پڑھیں:برطانیہ میں مستقل رہائش حاصل کرنے والوں کی تعداد میں اضافہ
اجلاس میں یہ طے پایا عوامی شکایات کے فوری ازالے کے لیے ڈیجیٹل شکایت مراکز قائم کیے جائیں گے، جبکہ مجموعی طور پر امیگریشن اور پاسپورٹ کے نظام کو بھی ڈیجیٹائز کیا جائے گا۔
مجوزہ اصلاحات کے تحت ایک نئی موبائل ایپ متعارف کروائی جائے گی، جس کے ذریعے شہری آن لائن شکایات اور سوالات جمع کرا سکیں گے۔ اس سے ردعمل کا وقت کم ہوگا اور دستی ( عمل پر انحصار بھی کم ہوگا۔
اس اقدام کا مقصد ٹیکنالوجی کے ذریعے سہولت، آسانی اور بہتر رسائی فراہم کرنا ہے تاکہ درخواست دہندگان کو بہتر خدمات مل سکیں۔ڈی جی پاسپورٹ کا کہنا ہے محکمہ جدید ٹیکنالوجی کے ذریعے عوام کو بہتر سہولیات فراہم کرنے کے لیے پرعزم ہے، اور 24 گھنٹے فعال ڈیجیٹل خدمات کے منصوبوں کو تیزی سے آگے بڑھایا جا رہا ہے۔
