پنجگور(پاک ترک نیوز )پنجگور میں سکیورٹی فورسز نے انٹیلی جنس اطلاعات کی بنیاد پر کامیاب آپریشن کرتے ہوئے فتنۃ الہندوستان سے تعلق رکھنے والے 5 دہشت گردوں کو ہلاک کردیا۔
آئی ایس پی آر کے مطابق 10 اگست کو پنجگور میں تیز رفتار انٹیلی جنس بیسڈ آپریشن کیا گیا۔ آپریشن کے دوران دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا۔
آئی ایس پی آر کے مطابق دہشت گردوں کے قبضے سے آئی ای ڈیز بھی برآمد ہوئیں جنہیں موقع پر ہی تلف کردیا گیا۔ممکنہ خطرات کے خاتمے کے لیے علاقے میں سینیٹائزیشن آپریشن بھی کیا گیا۔
آئی ایس پی آر کا کہنا ہے کہ فتنۃ الہندوستان سے وابستہ دہشت گردوں کے خاتمے کے لیے سکیورٹی فورسز کی کارروائیاں جاری ہیں، جبکہ ملک سے دہشت گردی کے ناسور کے مکمل خاتمے کے لیے آپریشن عزمِ استحکام کے تحت کارروائیاں جاری رکھی جائیں گی۔
