اسلام آباد(پاک ترک نیوز)مالدیپ کے صدر ڈاکٹر محمد معیزو نے کہا ہے کہ پاکستان کی قیادت کے ساتھ علاقائی اور عالمی امور پر گفتگو ہوئی، جبکہ دونوں ممالک کے درمیان طے پانے والی 20 مفاہمتی یادداشتیں دوطرفہ تعلقات میں اہم پیش رفت ہیں۔
صدر محمد معیزو نے کہا کہ پاکستان اور مالدیپ نے دوطرفہ تعاون کو نئی جہت دینے اور تعلقات کو نئی بلندیوں تک لے جانے کے عزم کا اعادہ کیا ہے۔ دونوں ممالک تعلیم، صحت، تجارت اور دیگر شعبوں میں تعاون بڑھائیں گے۔
انہوں نے کہا کہ آئندہ دو سال میں دوطرفہ تجارتی حجم 20 کروڑ ڈالر تک لے جانے کے لیے مشترکہ کوششیں کی جائیں گی۔ پاکستان اور مالدیپ کے کاروباری فورم سے تجارتی اور اقتصادی تعاون کے نئے مواقع پیدا ہوں گے، جبکہ یہ فورم کاروباری رہنماؤں اور سرمایہ کاروں کو قریب لانے میں اہم کردار ادا کرے گا۔
یہ بھی پڑھیں: سردیوں سے پہلے ہی ایل پی جی کی قیمتوں میں بڑا اضافہ، کراچی میں فی کلو 550 روپے تک پہنچ گئی
مالدیپ کے صدر کے مطابق نوجوانوں کے تبادلے کے پروگرام کے تحت وفود کے تبادلوں کو بھی وسعت دی جائے گی۔ مصنوعی ذہانت اور ڈیجیٹل ٹیکنالوجی سمیت جدید شعبوں سے استفادہ کرنا وقت کی اہم ضرورت ہے۔
انہوں نے ماحولیاتی تبدیلیوں کو سلامتی کے لیے خطرہ قرار دیتے ہوئے کہا کہ اس چیلنج سے نمٹنے کے لیے بھی باہمی تعاون کی ضرورت ہے۔
