پشاور(پاک ترک نیوز)بالاکوٹ کے میدانی علاقوں میں دوسرے روز بھی بارش کا سلسلہ جاری ہے، جبکہ بابوسر ٹاپ، جھیل سیف الملوک، بیسر، بڑوائی اور لالہ زار سمیت سیاحتی مقامات اور بلند پہاڑوں پر موسم سرما کی پہلی برفباری نے موسم کا رنگ بدل دیا۔
برفباری کے بعد پہاڑوں نے سفید چادر اوڑھ لی، دلکش قدرتی مناظر نے سیاحوں کے دل موہ لیے، جبکہ سردی کی شدت میں بھی اضافہ ہوگیا ہے۔ ملک بھر سے آنے والے سیاح حسین نظاروں اور خوشگوار موسم سے لطف اندوز ہو رہے ہیں۔
یہ بھی پڑھیں: سری لنکا کے خلاف ٹیسٹ سیریز، مائیک ہیسن کو عبوری ہیڈ کوچ بنانے کا امکان
دوسری جانب شاہراہِ کاغان ٹریفک کے لیے مکمل طور پر بحال ہے، تاہم ناران پولیس نے گٹی داس سے آگے بابوسر ٹاپ کی جانب جانے والی شاہراہ عارضی طور پر بند کر دی ہے۔ اس حوالے سے تحصیل انتظامیہ کی جانب سے تاحال باقاعدہ نوٹیفکیشن جاری نہیں کیا گیا۔
سیاحوں کو ہدایت کی جاتی ہے کہ بلند پہاڑی علاقوں کا رخ کرنے سے پہلے سڑکوں کی صورت حال اور موسم کی تازہ معلومات ضرور حاصل کریں۔
