اسلام آباد(پاک ترک نیوز)ملتان کے قریب رحمان بابا ایکسپریس کی بوگیاں پٹری سے اترنے کے واقعے پر صدر مملکت آصف علی زرداری اور وزیراعظم شہباز شریف نے نوٹس لے لیا۔
صدر مملکت آصف علی زرداری نے ٹرین حادثے پر گہری تشویش کا اظہار کرتے ہوئے جاں بحق ہونے والے مسافروں کے اہل خانہ سے دلی تعزیت اور ہمدردی کا اظہار کیا ہے۔ صدر مملکت نے زخمی مسافروں کی جلد صحت یابی کے لیے نیک تمناؤں کا اظہار بھی کیا۔
صدر مملکت نے متعلقہ حکام کو متاثرہ مسافروں کی امداد اور انہیں ہر ممکن سہولیات فراہم کرنے کی ہدایت کرتے ہوئے حادثے کی وجوہات کا تعین کرنے کے لیے شفاف تحقیقات کرانے پر زور دیا۔
یہ بھی پڑھیں: کراچی سے 4دہشت گرد گرفتار،دستی بم برآمد
دوسری جانب وزیراعظم شہباز شریف نے بھی ملتان میں رحمان بابا ایکسپریس کی بوگیاں پٹری سے اترنے کے واقعے کا نوٹس لیتے ہوئے زخمیوں سے اظہار افسوس کیا ہے۔
وزیراعظم نے متعلقہ حکام کو زخمیوں کی فوری اور بہترین طبی سہولیات یقینی بنانے اور امدادی کارروائیاں تیز کرنے کی ہدایت کی ہے۔
