کراچی(پاک ترک نیوز)کراچی میں اے ٹی سی اور وفاقی و سول حساس اداروں نے مشترکہ کارروائیوں کے دوران کالعدم دہشت گرد تنظیموں سے تعلق رکھنے والے چار مبینہ دہشت گردوں کو گرفتار کر لیا۔ گرفتار ملزمان کے قبضے سے چار دستی بم اور ایک پستول برآمد ہوا ہے، جبکہ ان کے خلاف پانچ مقدمات درج کرکے تفتیش شروع کر دی گئی ہے۔
انسدادِ دہشت گردی محکمہ کے مطابق ابوالحسن اصفہانی روڈ، بلاک فور کے قریب کارروائی کے دوران بلوچستان لبریشن آرمی سے تعلق رکھنے والے تین مبینہ دہشت گردوں کو گرفتار کیا گیا۔ ان کی شناخت غلام یاسین، آفتاب احمد اور شعیب کے نام سے ہوئی ہے۔
حکام کا دعویٰ ہے کہ گرفتار ملزمان بلوچستان میں ٹارگٹ کلنگ اور فرنٹیئر کور اور کسٹمز کی موبائل گاڑیوں پر حملوں میں ملوث رہے ہیں۔ ملزمان شہر کے حساس مقامات اور قانون نافذ کرنے والے اداروں کے دفاتر کو نشانہ بنانے کی منصوبہ بندی بھی کر رہے تھے۔
دوسری کارروائی کورنگی کازوے کے قریب ندی کے علاقے میں کی گئی، جہاں سندھ ریولوشنری آرمی سے تعلق رکھنے والے مبینہ دہشت گرد آصف علی عرف آصف سندھی کو گرفتار کیا گیا۔ اس کے قبضے سے ایک دستی بم برآمد ہوا۔
یہ بھی پڑھیں: دہشت گردی بڑھنے پر خیبر پختونخوا میں ایمرجنسی لگائی گئی ،اعظم نذیر تارڑ
انسدادِ دہشت گردی محکمہ کے مطابق گرفتار ملزم نے ایک غیر ملکی شہری، پولیس کے ایک ڈپٹی سپرنٹنڈنٹ، ریلوے پٹڑی اور ایک اہم سیاسی شخصیت کے گھر کی نگرانی کرنے کا انکشاف کیا ہے۔ حکام کا کہنا ہے کہ ملزم قانون نافذ کرنے والے اداروں کے دفاتر کو نشانہ بنانے کی منصوبہ بندی بھی کر رہا تھا۔
چاروں ملزمان کے خلاف انسدادِ دہشت گردی محکمہ کے تھانے میں پانچ مقدمات درج کر لیے گئے ہیں، جبکہ گرفتار افراد کے دیگر ساتھیوں اور مبینہ سہولت کاروں کی گرفتاری کے لیے کارروائیاں جاری ہیں۔
