پشاور(پاک ترک نیوز ) خیبرپختونخوا حکومت نے صوبے کی سرکاری جامعات کو شدید مالی بحران سے نکالنے کے لیے وفاقی حکومت سے 18 ارب روپے کے خصوصی مالی پیکج کی فراہمی کی درخواست کردی۔
اس حوالے سے وفاقی حکومت کو ارسال کیے گئے خط میں کہا گیا ہے کہ سرکاری جامعات کی مالی مشکلات اس حد تک بڑھ چکی ہیں کہ ان کا وجود اور مستقبل خطرے میں پڑ گیا ہے۔
خط کے مطابق جامعات کے بقایا جات اور واجبات کی ادائیگی کے لیے 6 ارب روپے کی یکمشت گرانٹ، ترقیاتی منصوبوں اور بنیادی ڈھانچے کی بہتری کے لیے مزید 6 ارب روپے جبکہ جامعات کے مستقل مالی استحکام کے لیے انڈومنٹ فنڈز کی مد میں 6 ارب روپے فراہم کرنے کی درخواست کی گئی ہے۔
خیبرپختونخوا حکومت نے مالی سال 2026-27 کے لیے مجموعی طور پر 18 ارب روپے کا خصوصی پیکج تجویز کیا ہے۔
خط میں مؤقف اختیار کیا گیا ہے کہ جامعات کو ملنے والی باقاعدہ گرانٹس ضروری اخراجات پورے کرنے کے لیے ناکافی ہیں۔ بجلی، گیس، تجربہ گاہوں اور سیکیورٹی کے اخراجات میں مسلسل اضافے کے باعث مالی دباؤ بڑھ رہا ہے جبکہ تنخواہوں اور پنشن کی ادائیگی بھی جامعات کے لیے مشکل ہوتی جا رہی ہے۔
حکومت کے مطابق دور دراز اضلاع میں قائم نئی جامعات کو بھی شدید مالی مشکلات کا سامنا ہے۔ فیسوں پر انحصار بڑھ چکا ہے جبکہ طلبہ پر مزید مالی بوجھ ڈالنے کی گنجائش باقی نہیں رہی۔
خط میں نشاندہی کی گئی ہے کہ متعدد جامعات بجٹ خسارے اور واجب الادا بلوں کے باعث مشکلات کا شکار ہیں جبکہ تجربہ گاہوں، کتب خانوں، طلبہ کی رہائش گاہوں اور جدید ڈیجیٹل سہولتوں کا نظام بھی متاثر ہو رہا ہے۔
خیبرپختونخوا حکومت نے وفاق سے مطالبہ کیا ہے کہ اعلیٰ تعلیمی کمیشن کے ذریعے خصوصی گرانٹ جاری کی جائے اور جامعات کے تنخواہوں اور پنشن کے اخراجات میں وفاقی حکومت کی شراکت کے لیے مستقل طریقہ کار وضع کیا جائے۔
یہ بھی پڑھیں: افغانستان میں آزادی صحافت پر طالبان کی پابندیاں، 77 سے زائد صحافی گرفتار
خط میں کہا گیا ہے کہ جامعات میں سرمایہ کاری دراصل پاکستان کے مستقبل میں سرمایہ کاری ہے، اس لیے معاملے پر فوری فیصلہ ہزاروں طلبہ اور ملازمین کے مستقبل کے لیے انتہائی اہمیت رکھتا ہے۔
