اسلام آباد: (پاک ترک نیوز)حکومتِ پاکستان نے سال 2026 کے لیے سرکاری تعطیلات کا باضابطہ شیڈول جاری کر دیا ہے، جس کا مقصد شہریوں کو کام، تعلیم، سفر اور خاندانی سرگرمیوں کی بہتر منصوبہ بندی میں سہولت فراہم کرنا ہے۔
یہ تعطیلات قومی تاریخ، مذہبی روایات اور ثقافتی تنوع کی عکاسی کرتی ہیں، جو سرکاری و نجی اداروں کے لیے یکساں اہمیت رکھتی ہیں۔اعلان کردہ شیڈول کے مطابق 2026 میں پاکستان بھر میں مجموعی طور پر 17 سرکاری تعطیلات ہوں گی، جن میں قومی، مذہبی اور اقلیتی برادریوں سے متعلق خصوصی چھٹیاں شامل ہیں۔
اسلامی تعطیلات چاند دیکھنے سے مشروط ہوں گی، اس لیے ان کی تاریخوں میں تبدیلی کا امکان موجود رہے گا۔قومی تعطیلات میں 5 فروری کو یومِ کشمیر منایا جائے گا، جس کے موقع پر ملک بھر میں سرکاری دفاتر اور تعلیمی ادارے بند رہیں گے۔
23 مارچ کو یومِ پاکستان منایا جائے گا، جو قراردادِ پاکستان کی یاد میں منسوب ہے۔ یکم مئی کو یومِ مزدور کی چھٹی ہوگی، جبکہ 28 مئی کو یومِ تکبیر کے موقع پر تعطیل دی جائے گی، جو پاکستان کے ایٹمی طاقت بننے کی علامت ہے۔
14 اگست کو یومِ آزادی، 9 نومبر کو یومِ اقبال اور 25 دسمبر کو قائداعظم ڈے منایا جائے گا، جو بانیٔ پاکستان محمد علی جناحؒ کی سالگرہ کا دن ہے۔
مذہبی تعطیلات میں عیدالفطر 21 سے 23 مارچ تک متوقع ہے، جبکہ عیدالاضحیٰ 27 اور 28 مئی کو ہونے کا امکان ظاہر کیا گیا ہے۔
25 اور 26 جون کو عاشورہ کی تعطیلات ہوں گی، جبکہ عید میلادالنبی ﷺ 25 اگست کو متوقع ہے، تاہم ان تمام تاریخوں کا حتمی اعلان چاند نظر آنے کے بعد کیا جائے گا۔
اقلیتی برادریوں کے لیے بھی خصوصی تعطیلات شامل کی گئی ہیں۔ 25 دسمبر کو کرسمس کے موقع پر ملک بھر میں عام تعطیل ہوگی، جبکہ 26 دسمبر کو مسیحی ملازمین کے لیے اضافی چھٹی دی جائے گی۔
ماہرین کے مطابق سرکاری تعطیلات کا بروقت اعلان ملازمین، طلبہ، کاروباری طبقے اور مسافروں کے لیے نہایت مفید ثابت ہوگا، کیونکہ اس سے وہ پورے سال کی پیشگی منصوبہ بندی بہتر انداز میں کر سکیں گے۔
پاکستان میں 2026 کی سرکاری تعطیلات کا شیڈول جاری
