پشاور(پاک ترک نیوز ) پشاور میں دہشت گردی کی بڑی کارروائی ناکام بنا دی گئی، کاؤنٹر ٹیررزم ڈیپارٹمنٹ نے ورسک روڈ کے علاقے گڑھی شیرداد میں خفیہ اطلاع پر کارروائی کرتے ہوئے ایک دہشت گرد کو ہلاک کردیا۔
حکام کے مطابق پشاور میں تین خودکش حملہ آوروں کی موجودگی کی مصدقہ اطلاع ملی تھی، جو ایک حساس تنصیب کو نشانہ بنانے کی تیاری کر رہے تھے۔ اطلاع پر سی ٹی ڈی، ضلعی پولیس اور متعلقہ ادارے کی ٹیم نے مشترکہ انٹیلی جنس بیسڈ آپریشن شروع کیا۔
کارروائی کے دوران علاقے کو گھیرے میں لے کر ناکہ بندی کی گئی جبکہ ڈرون کے ذریعے بھی نگرانی کی گئی۔ اسی دوران ایک دہشت گرد چھت پر پہنچا اور سی ٹی ڈی اہلکاروں پر فائرنگ کرتے ہوئے فرار ہونے کی کوشش کی۔
فائرنگ کے تبادلے میں سی ٹی ڈی کانسٹیبل محمد افاق شہید جبکہ تین اہلکار زخمی ہوگئے۔ پولیس کی جوابی کارروائی میں فائرنگ کرنے والا دہشت گرد مارا گیا۔
پولیس کے مطابق ہلاک دہشت گرد سے تین مذہبی کلمات درج ہیڈ بینڈز بھی برآمد ہوئے ہیں۔
حکام کا کہنا ہے کہ آپریشن کے دوران باقی دو دہشت گردوں کی گرفتاری کے لیے سرچ اور کلیئرنس کارروائی جاری ہے، جبکہ علاقے میں اضافی نفری تعینات کردی گئی ہے اور ممکنہ خطرے کے پیش نظر سرچ آپریشن مزید وسیع کردیا گیا ہے۔
آپریشن کی نگرانی ایڈیشنل آئی جی کاؤنٹر ٹیررزم ڈیپارٹمنٹ خیبرپختونخوا نے خود کی۔ آئی جی خیبرپختونخوا ذوالفقار حمید اور ایڈیشنل آئی جی سی ٹی ڈی نے آپریشن میں حصہ لینے والے اہلکاروں کو خراجِ تحسین پیش کرتے ہوئے کہا ہے کہ دہشت گردوں کے عزائم ہر صورت ناکام بنائے جائیں گے اور دہشت گردی کے مکمل خاتمے تک کارروائیاں جاری رہیں گی۔
