اسلام آباد(پاک ترک نیوز)اپنا گھر بنانے کا خواب دیکھنے والے پاکستانیوں کے لیے اہم خبر! حکومت نے وزیراعظم اپنا گھر پروگرام کے تحت ہاؤسنگ قرض حاصل کرنے کا طریقہ آسان بنا دیا ہے۔ قرض کے لیے بینکوں کو درکار دستاویزات کی تعداد پچیس سے کم کرکے صرف پانچ کر دی گئی ہے، جبکہ قرض کی درخواستوں پر کارروائی کا دورانیہ بھی پندرہ کاروباری دن مقرر کیا گیا ہے۔ حکومت کا کہنا ہے کہ اس اقدام سے شہریوں کو کاغذی کارروائی، غیر ضروری تاخیر اور بینکوں کے چکر لگانے سے ریلیف ملے گا۔
اسلام آباد سے اہم پیش رفت سامنے آئی ہے، جہاں وزیراعظم شہباز شریف کی ہدایت پر اپنا گھر پروگرام کے تحت ہاؤسنگ فنانس کے لیے دستاویزات کی شرائط آسان بنا دی گئی ہیں۔
وزارتِ ہاؤسنگ اینڈ ورکس کے مطابق، اب بینکوں کو ہاؤسنگ قرض کے لیے جائیداد سے متعلق صرف پانچ بنیادی دستاویزات درکار ہوں گی۔ ان میں انتقال اور قبضے کا خط، جگہ کا نقشہ، رہن رکھنے کی اجازت کا خط اور اندراجِ رہن کی دستاویزات شامل ہیں۔
اسٹیٹ بینک نے بھی بینکوں کو دستاویزات کے تقاضے معیاری بنانے اور ان پر عمل درآمد کی ہدایات جاری کر دی ہیں۔ اس اقدام کا مقصد درخواست گزاروں سے بار بار اضافی کاغذات طلب کرنے اور قرض کے حصول میں غیر ضروری رکاوٹوں کو کم کرنا ہے۔
وزیراعظم اپنا گھر پروگرام کے تحت پہلی مرتبہ گھر بنانے کے خواہش مند اہل شہریوں کو ایک کروڑ روپے تک قرض فراہم کرنے کی سہولت دی جا رہی ہے۔ حکومت کے مطابق، قرض کی درخواستوں پر کارروائی کا دورانیہ بھی پندرہ کاروباری دن تک محدود کیا گیا ہے۔
یہ بھی پڑھیں: سفارش کا دور ختم، پشاور سمیت پورے خیبرپختونخوا کو تجاوزات سے پاک کریں گے، فیصل کریم کنڈی
حکومت کو دی گئی بریفنگ کے مطابق، پروگرام کے تحت اب تک پچھتر ہزار ایک سو اٹھانوے درخواست گزاروں کے لیے چار سو اڑتالیس ارب روپے کے قرض منظور کیے جا چکے ہیں، جبکہ چودہ ہزار افراد کو چھہتر ارب روپے فراہم کیے جا چکے ہیں۔
رواں مالی سال کے لیے سات سو ارب روپے کے قرض کے ذریعے ایک لاکھ پچیس ہزار رہائشی یونٹس کی مالی معاونت کا ہدف مقرر کیا گیا ہے۔
