پشاور(پاک ترک نیوز) گورنر خیبرپختونخوا فیصل کریم کنڈی نے کہا ہے کہ سفارش کا دور ختم ہو چکا، اب تجاوزات کے خاتمے کے لیے کسی سیاسی شخصیت کی سفارش نہیں چلے گی۔ پشاور سمیت پورے صوبے میں تجاوزات کے خلاف بلاامتیاز کارروائی کی جائے گی اور جہاں بھی غیر قانونی قبضے موجود ہیں، انہیں ختم کیا جائے گا۔
پشاور میں میڈیا سے گفتگو کرتے ہوئے گورنر فیصل کریم کنڈی نے کہا کہ وہ تجاوزات کے خلاف جاری کارروائی کا معائنہ کرنے آئے ہیں۔ کوہاٹ روڈ پر گڑھی قمردین کے علاقے میں آپریشن جاری ہے، عوام فوری طور پر تجاوزات ہٹا دیں، بصورتِ دیگر کارروائی کا سامنا کرنا پڑے گا۔ انہوں نے کہا کہ ماضی میں تجاوزات کے مسئلے پر توجہ نہیں دی گئی، تاہم اب پورے صوبے کو تجاوزات سے پاک کرنے کے لیے اقدامات کیے جائیں گے۔
یہ بھی پڑھیں: اسحاق ڈار شنگھائی تعاون تنظیم کے اجلاس میں شرکت کے لیے تاجکستان روانہ
گورنر خیبرپختونخوا نے کہا کہ گندم کے معاملے پر رپورٹ سامنے آنے کے بعد کارروائی کی جائے گی۔ شہریوں کے مفاد میں شروع کیے گئے ترقیاتی منصوبے جلد مکمل کیے جائیں گے، جبکہ مالی مفادات کے لیے شروع کیے گئے منصوبوں کے ذمہ داروں کے خلاف بھی کارروائی ہوگی۔
بجلی کی لوڈشیڈنگ کے مسئلے پر گفتگو کرتے ہوئے فیصل کریم کنڈی نے کہا کہ اس معاملے پر وفاقی حکومت سے بات کی جائے گی۔ انہوں نے کہا کہ بجلی چوری کے دن گزر گئے، اگر بجلی کے بلوں کی وصولی نہیں ہوگی تو بجلی کیسے پیدا ہوگی؟ وفاق اور صوبے کے درمیان کوئی لڑائی نہیں، تمام صوبوں کے ساتھ تعلقات بہتر رکھے جائیں گے۔
گورنر نے مزید کہا کہ پشاور ہائی کورٹ کے سامنے راستہ آج کھولنے کی کوشش کی جائے گی، جبکہ شہر میں ٹریفک قوانین پر عمل درآمد بھی یقینی بنایا جائے گا۔
