اسلام آباد (پاک ترک یوز )وفاقی حکومت نے جماعت اسلامی سے رابطے تیز کر دیے، جماعت اسلامی نے حکومتی رابطوں کی تصدیق کر دی۔
جماعت اسلامی کے سیکریٹری اطلاعات کے مطابق وزیراعظم کے مشیر رانا ثنا اللہ خان اور وفاقی وزیر احسن اقبال نے گزشتہ رات نائب امیر جماعت اسلامی لیاقت بلوچ سے رابطہ کیا۔
لیاقت بلوچ کا کہنا ہے کہ حکومت مذاکرات چاہتی ہے تو ریلیف پیکیج کے ساتھ مذاکرات کی میز پر آئے۔
ان کا کہنا تھا کہ حکومتی وزرا پیٹرولیم لیوی میں کمی اور بجلی کی قیمتیں کم کرنے کے جامع پلان کے ساتھ آئیں۔
نائب امیر جماعت اسلامی نے کہا کہ جماعت اسلامی ہمیشہ عوامی مسائل اور عوامی ایشوز کی بات کرتی ہے، حکومت کو عوام کو ریلیف دینا ہوگا۔
لیاقت بلوچ نے خبردار کیا کہ اگر حکومت نے عوامی مطالبات تسلیم نہ کیے تو جماعت اسلامی اسلام آباد کی طرف مارچ کرے گی۔
حکومتی رابطوں کے بعد مذاکرات کا امکان پیدا ہوگیا ہے، تاہم جماعت اسلامی نے واضح کر دیا ہے کہ بات چیت صرف اسی صورت میں آگے بڑھے گی جب حکومت عوام کو عملی ریلیف دینے کے لیے ٹھوس اقدامات پیش کرے۔
