پشاور(پاک ترک نیوز)گورنر خیبر پختونخوا فیصل کریم کنڈی نے کہا ہے کہ دہشت گردی کا خاتمہ ہماری پہلی ترجیح ہے، ترقیاتی منصوبوں پر قربانی دے سکتے ہیں لیکن سکیورٹی پر کوئی سمجھوتہ نہیں کریں گے۔
صوبائی اپیکس کمیٹی کے اجلاس سے خطاب کرتے ہوئے گورنر خیبر پختونخوا نے کہا کہ صوبے کے عوام امن اور خوشحالی چاہتے ہیں، دہشت گردی کے خاتمے کے لیے جو ہمارے ساتھ چلنا چاہتا ہے، چلے۔ پولیس کے تمام مطالبات پورے کرنا ہوں گے۔
یہ بھی پڑھیں: خیبر پختونخوا میں ایمرجنسی اور گورنر راج کے خلاف پشاور ہائی کورٹ میں درخواست دائر
فیصل کریم کنڈی نے کہا کہ ریاست نے ہم پر اعتماد کیا ہے، ہمیں دن رات کام کرنا ہوگا۔ وفاقی حکومت نے بھی ہم پر اعتماد کیا ہے، ہم چوبیس گھنٹے کام کریں گے۔ امن کے قیام کے لیے تمام ادارے ایک پیج پر ہیں، فوج اور پولیس کے ساتھ مل کر صوبے میں امن لائیں گے۔
گورنر خیبر پختونخوا کا کہنا تھا کہ صوبے میں قدرتی وسائل کی کوئی کمی نہیں، پی ٹی آئی نے تیرہ سال میں جو کام کیا، وہ ہم نے تین ماہ میں کرنا ہے۔ انہوں نے واضح کیا کہ اب صوبائی حکومت اور وفاق کے درمیان کوئی خلا نہیں ہوگا اور دہشت گردی کے خاتمے کے لیے مشترکہ کوششیں کی جائیں گی۔
