لاہور:(پاک ترک نیوز)پاکستان سپر لیگ کے توسیعی مرحلے میں ایک اہم سنگِ میل عبور کر لیا گیا ہے، جہاں پاکستانی نژاد امریکی کاروباری شخصیت فواد سرور نے اپنے آبائی شہر حیدرآباد کی پی ایس ایل فرنچائز خرید لی ہے۔
اس پیش رفت کو نہ صرف حیدرآباد بلکہ پاکستانی کرکٹ کے لیے بھی ایک بڑی کامیابی قرار دیا جا رہا ہے۔حیدرآباد فرنچائز کے مالک فواد سرور امریکا کی ریاست ٹیکساس میں مقیم ہیں۔
وہ ایف کے ایس (FKS) گروپ اور کنگزمین (Kingsmen) کے بانی اور مالک ہیں، جو کرکٹ کے فروغ میں سرگرم کردار ادا کر رہے ہیں۔
وہ امریکا میں شکاگو کنگزمین کرکٹ ٹیم کے بھی مالک ہیں، جو 2024 میں چیمپئن شپ جیت چکی ہے۔فواد سرور کا تعلق حیدرآباد سے ہے، جہاں انہوں نے ابتدائی تعلیم حاصل کی۔ بعد ازاں اعلیٰ تعلیم کے لیے بیرونِ ملک منتقل ہوئے اور اس وقت ٹیکساس میں مقیم ہیں۔
فواد سرور کا بنیادی کاروبار ایف کے ایس گروپ سے وابستہ ہے۔ وہ ایف کے ایس اور اس سے منسلک اداروں، جن میں FKS Aviation، ProCare Health اور Kingsmen Enterprise شامل ہیں،ان میں صدر کی حیثیت سے خدمات انجام دے رہے ہیں۔ فواد سرور نے تصدیق کی ہے کہ پی ایس ایل فرنچائز کا ہوم سٹی ان کا آبائی شہر حیدرآباد، سندھ ہوگا۔
ان کے مطابق کنگزمین گروپ امریکا اور پاکستان میں کرکٹ کے فروغ کے لیے کام کر رہا ہے، جبکہ گزشتہ سیزن میں ان کی ٹیم پاکستان کے ڈومیسٹک گریڈ ٹو ٹورنامنٹ میں بھی شریک رہی۔
