واشنگٹن ( پاک ترک نیوز) امریکی محکمہ خزانہ کے جون 2026 کے اعداد و شمار کے مطابق دنیا کے مختلف ممالک اور مالیاتی مراکز کے پاس امریکی خزانے کے کھربوں ڈالر کے بانڈز اور سیکیورٹیز موجود ہیں، جبکہ امریکی قومی قرضہ 40 کھرب ڈالر سے تجاوز کر چکا ہے۔
فہرست میں جاپان 1.117 کھرب ڈالر کے امریکی قرض کے ساتھ پہلے نمبر پر ہے۔ برطانیہ 940 ارب ڈالر کے ساتھ دوسرے جبکہ چین 633 ارب ڈالر کے ساتھ تیسرے نمبر پر ہے۔
چین ایک دہائی قبل امریکی قرض کا سب سے بڑا غیر ملکی مالک تھا، تاہم 2013-14 میں اس کی سرمایہ کاری 1.3 کھرب ڈالر سے زائد کی بلند ترین سطح پر پہنچنے کے بعد مسلسل کم ہوتی رہی، اور اب چین کے پاس موجود امریکی قرض اس کی بلند ترین سطح کا تقریباً نصف رہ گیا ہے۔
فہرست میں بیلجیم 483 ارب ڈالر، کینیڈا 460 ارب ڈالر، کیمن آئی لینڈز 453 ارب ڈالر اور لکسمبرگ 434 ارب ڈالر کے ساتھ نمایاں ہیں، جبکہ فرانس 390 ارب، آئرلینڈ 354 ارب، تائیوان 303 ارب اور سوئٹزرلینڈ 285 ارب ڈالر کے امریکی قرض کے مالک ہیں۔بھارت کے پاس 186 ارب ڈالر، سعودی عرب کے پاس 143 ارب ڈالر، متحدہ عرب امارات کے پاس 115 ارب ڈالر جبکہ اسرائیل کے پاس 111 ارب ڈالر کے امریکی خزانے کے بانڈز موجود ہیں۔
یہ بھی پڑھیں: نیپال اور تبت میں سیلاب و لینڈ سلائیڈنگ، 165 افراد جاں بحق
رپورٹ کے مطابق امریکی قومی قرضہ 40 کھرب ڈالر سے تجاوز کرچکا ہے۔ تاہم بیلجیم، کیمن آئی لینڈز اور لکسمبرگ جیسے مالیاتی مراکز کے اعداد و شمار میں یہ ضروری نہیں کہ تمام سیکیورٹیز انہی ممالک کی ملکیت ہوں، کیونکہ امریکی محکمہ خزانہ کے اعداد و شمار میں سیکیورٹیز کو اکثر اس مقام کے حساب سے شمار کیا جاتا ہے جہاں انہیں تحویل میں رکھا گیا ہے۔
