راولپنڈی(پاک ترک نیوز) چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر کو پاکستان اور ترکی کے درمیان دوطرفہ عسکری تعاون کو مضبوط بنانے کے لیے ان کی نمایاں خدمات اور عزم کے اعتراف میں جنرل سلچوک بائراکتاروغلو کی جانب سے ترک مسلح افواج کا امتیازی خدمات کا تمغہ عطا کیا گیا۔
انٹر سروسز پبلک ریلیشنز (آئی ایس پی آر) کی جانب سے جاری کردہ پریس ریلیز کے مطابق، فیلڈ مارشل سید عاصم منیر اس وقت جمہوریہ ترکیہ کے اعلیٰ سطحی سرکاری دورے پر ہیں۔ جس کا مقصد دونوں برادر ممالک کے درمیان گہرے اسٹریٹجک اور دفاعی تعلقات کو مزید فروغ دینا ہے۔
ترکیہ آمد پر فیلڈ مارشل کا پرتپاک استقبال کیا گیا جو پاکستان اور ترکی کے درمیان تاریخی اور برادرانہ تعلقات کا عکاس تھا۔دورے کے دوران، فیلڈ مارشل نے ترک سیاسی اور عسکری قیادت کے ساتھ اعلیٰ سطحی ملاقاتوں کا سلسلہ جاری رکھا۔
فیلڈ مارشل سید عاصم منیر نے صدر رجب طیب اردوان اور وزیر قومی دفاع یاشار گولر سے ملاقات کی اور باہمی دلچسپی کے امور اور علاقائی سلامتی پر تبادلہ خیال کیا۔ان اعلیٰ سطحی مذاکرات میں بدلتے ہوئے جغرافیائی سیاسی ماحول میں مزید مضبوط اسٹریٹجک شراکت داری کو فروغ دینے کے لیے دونوں اقوام کے مشترکہ وژن پر زور دیا گیا۔
یہ بھی پڑھیں: ملک کا امن پاک فوج سے جڑا ہے،علماء کرام
ترک جنرل اسٹاف ہیڈ کوارٹرز میں فیلڈ مارشل کا گارڈ آف آنر کے ساتھ استقبال کیا گیا۔انہوں نے ترک جنرل اسٹاف کے سربراہ جنرل سلچوک بائراکتاراوغلو کے ساتھ تفصیلی ملاقات کی۔ پریس ریلیز کے مطابق، دونوں رہنماؤں نے علاقائی سلامتی کی صورتحال اور باہمی دلچسپی کے پیشہ ورانہ امور پر تبادلہ خیال کیا۔
فیلڈ مارشل نے ترک بری فوج کے ہیڈ کوارٹرز کا بھی دورہ کیا۔ جہاں ترک بری فوج کے کمانڈر جنرل میتن توکل نے ان کا استقبال کیا۔
فیلڈ مارشل نے مصطفی کمال اتاترک کے مزار کا دورہ کیا۔ جہاں انہوں نے پھولوں کی چادر چڑھائی اور جدید ترکی کے بانی کو خراج عقیدت پیش کیا۔ ان کی دور اندیش قیادت اور دونوں ممالک کے درمیان گہرے تاریخی رشتوں کا اعتراف کیا۔
