اسلام آباد ( پاک ترک نیوز) وزیراعظم محمد شہباز شریف نے نوجوانوں کے عالمی دن پر اپنے پیغام میں کہا ہے کہ اس سال نوجوانوں کا عالمی دن "مختلف حالات، مشترکہ امنگیں” کے عنوان سے منایا جا رہا ہے۔
وزیراعظم نے کہا کہ دنیا کے مختلف خطوں میں نوجوانوں کی زندگی مختلف حالات کے زیر اثر ہوتی ہے، تاہم تابناک مستقبل کے خواب، امنگیں اور خواہشات سب کی یکساں ہوتی ہیں۔
شہباز شریف کا کہنا تھا کہ پاکستان کے نوجوان قوم کا انمول سرمایہ اور روشن مستقبل کے معمار ہیں۔ نوجوانوں کی صلاحیتوں اور بھرپور استعداد کا اظہار خوشحال، پُرامن اور مضبوط پاکستان کی تعمیر کے لیے ناگزیر ہے۔
انہوں نے کہا کہ پاکستان کی نوجوان آبادی نے مختلف شعبہ ہائے زندگی میں قومی اور عالمی سطح پر ملک کا نام روشن کیا ہے۔ نوجوانوں کی بہترین ذہنی، جسمانی، فکری اور علمی نشوونما کے لیے تمام دستیاب قومی وسائل کا استعمال حکومت کی ترجیحات میں شامل ہے۔
یہ بھی پڑھیں: جڑواں شہروں میں مون سون بادل برس پڑے، نالہ لئی میں طغیانی کا خدشہ
وزیراعظم کے مطابق حکومت نوجوانوں کو عصر حاضر سے ہم آہنگ جدید اور معیاری تعلیم، فنی و پیشہ ورانہ مہارتوں، روزگار کے مواقع، کاروبار و صنعت کاری، ڈیجیٹل جدت اور سماجی شمولیت کے ذریعے بااختیار بنانے کے لیے پُرعزم ہے۔
شہباز شریف نے کہا کہ حکومت پالیسی سازی کے ساتھ ساتھ عملی اقدامات بھی کر رہی ہے تاکہ نوجوان اپنی صلاحیتوں، ہنر اور پیشہ ورانہ استعداد کو عالمی معیار سے ہم آہنگ کرسکیں اور عالمی سطح پر پاکستان کا نام روشن کریں۔
وزیراعظم نے کہا کہ وزیراعظم یوتھ اسکل ڈویلپمنٹ پروگرام ملک میں باصلاحیت اور ہنرمند افرادی قوت تیار کرنے کے لیے کوشاں ہے، جبکہ پیشہ ورانہ مہارت سے لیس افرادی قوت کی عالمی معیار کے مطابق تربیت کے لیے نیشنل ووکیشنل اینڈ ٹیکنیکل ٹریننگ کمیشن کو ترجیحی بنیادوں پر مزید فعال کیا گیا ہے۔
انہوں نے نوجوانوں پر زور دیا کہ وہ دیانت داری، ذمہ داری اور خدمتِ وطن کے جذبے کے ساتھ محنت کا سفر جاری رکھیں۔
وزیراعظم شہباز شریف نے کہا کہ نوجوانوں کی ترقی ہی قوم کی پائیدار ترقی اور تابناک مستقبل کی منزل کی بنیاد ہے۔
